ഗൗതം അദാനിയുടെ ആസ്തി 50 ബില്യൺ ഡോളറിന് താഴെയായി. കഴിഞ്ഞ 24 മണിക്കൂറിനുള്ളിൽ 2.8 ബില്യൺ ഡോളറിന്റെ നഷ്ടമുണ്ടായതായി ഫോർബ്സ് പറയുന്നു. 47.9 ബില്യൺ ഡോളറിന്റെ ആസ്തിയാണ് അദാനിക്ക്. ബ്ലൂംബെർഗ് ബില്യണയേഴ്സ് ഇൻഡക്സ് കണക്കാക്കുന്നത് 49.1 ബില്യൺ ഡോളറാണ്. ചുരുക്കത്തിൽ ഏഷ്യയിലെ ഏറ്റവും ധനികനായ വ്യക്തിയും ലോകത്തിലെ രണ്ടാമത്തെ ഏറ്റവും ധനികനായ വ്യക്തിയുമായിരുന്നു നേരത്തെ അദാനി. ഇന്ത്യയിലെ ഏറ്റവും വലിയ ധനികൻ എന്ന സ്ഥാനത്തുനിന്നും അദാനി താഴേക്കു പോയി. 85 ബില്യൺ ഡോളർ ആസ്തിയുള്ള റിലയൻസിന്റെ മുകേഷ് അംബാനിയെക്കാൾ വളരെ പിന്നിലാണ് അദാനി ഇപ്പോൾ.
ന്യൂയോർക്ക് ആസ്ഥാനമായുള്ള ഓഹരി ഫോറൻസിക് സ്ഥാപനമായ ഹിൻഡൻബർഗിന്റെ ആരോപണത്തെത്തുടർന്ന് തകരുന്നത് വരെ അദാനി ഗ്രൂപ്പ് ഓഹരികൾ കഴിഞ്ഞ ഒരു വർഷമായി ഉയർന്ന വേഗതയിൽ കുതിച്ചുയരുകയായിരുന്നു. ഹിൻഡൻബർഗ് റിപ്പോർട്ട് പുറത്തുവന്നതിന് ശേഷം ഗ്രൂപ്പ് കമ്പനികൾക്ക് 132 ബില്യൺ ഡോളർ വിപണി മൂല്യം നഷ്ടപ്പെട്ടതായി വിശ്വസിക്കപ്പെടുന്നു.
