തമിഴ്‌നാട് മുഖ്യമന്ത്രി എംകെ സ്റ്റാലിനെതിരെ അപകീർത്തികരമായ പരാമർശം നടത്തിയെന്നാരോപിച്ച് അറസ്റ്റിലായ യുട്യൂബർ സട്ടായി ദുരൈമുരുകന് സുപ്രീം കോടതി ജാമ്യം അനുവദിച്ചു. ജാമ്യം റദ്ദാക്കിയ മദ്രാസ് ഹൈക്കോടതി ഉത്തരവിനെ ചോദ്യം ചെയ്ത് യൂട്യൂബർ സട്ടായി സമർപ്പിച്ച ഹർജി പരിഗണിച്ച തെരഞ്ഞെടുപ്പിന് മുമ്പ് യൂട്യൂബിൽ ആരോപണങ്ങൾ ഉന്നയിക്കുന്ന എല്ലാവരെയും ജയിലിൽ അടയ്ക്കാൻ തുടങ്ങിയാൽ, എത്രപേരെ ജയിലിൽ അടയ്ക്കുമെന്ന് നിശിതമായി നിരീക്ഷിച്ചു. സട്ടായിയുടെ ജാമ്യം റദ്ദാക്കിയ ഉത്തരവ് റദ്ദാക്കിക്കൊണ്ട്, അദ്ദേഹത്തിന് അനുവദിച്ച സ്വാതന്ത്ര്യം അദ്ദേഹം ദുരുപയോഗം ചെയ്തുവെന്ന് പറയാനാവില്ലെന്ന് സുപ്രീം കോടതി അഭിപ്രായപ്പെട്ടു.
“പ്രതിഷേധിക്കുകയും അഭിപ്രായങ്ങൾ പ്രകടിപ്പിക്കുകയും ചെയ്യുന്നത് അദ്ദേഹം തൻ്റെ സ്വാതന്ത്ര്യം ദുരുപയോഗം ചെയ്യലായി പറയാനാവില്ല.”– ജസ്റ്റിസുമാരായ എഎസ് ഓക്ക, ഉജ്ജൽ ഭൂയാൻ എന്നിവരുടെ ബെഞ്ച് ജാമ്യം അനുവദിച്ചുകൊണ്ട് പറഞ്ഞു. അപകീർത്തികരമായ പരാമർശങ്ങൾ നടത്തുന്നത് തടയാൻ യൂട്യൂബർക്കെതിരെ കർശന വ്യവസ്ഥകൾ ഏർപ്പെടുത്തണമെന്ന് തമിഴ്‌നാട് സർക്കാരിനെ പ്രതിനിധീകരിച്ച് മുതിർന്ന അഭിഭാഷകൻ മുകുൾ റോത്തഗി അഭിപ്രായപ്പെട്ടു.
ഇതിന് മറുപടിയായി “ഏത് അപകീർത്തികരം ഏത് അല്ലാത്തത് എന്ന് ഈ കോടതി തീരുമാനിക്കും.” എന്ന് കോടതി പറഞ്ഞു.
“പ്രതിഷേധിക്കുകയും അഭിപ്രായങ്ങൾ പ്രകടിപ്പിക്കുകയും ചെയ്യുന്നതിലൂടെ പരാതിക്കാരൻ തനിക്ക് നൽകിയിട്ടുള്ള സ്വാതന്ത്ര്യം ദുരുപയോഗം ചെയ്തുവെന്ന് ഞങ്ങൾ കരുതുന്നില്ല. അല്ലെങ്കിലും കുറ്റപ്പെടുത്തപ്പെട്ട ഉത്തരവിൽ പറഞ്ഞിരിക്കുന്ന കാരണങ്ങൾ ഇതിന് കാരണമാവില്ലെന്നാണ് ഞങ്ങളുടെ അഭിപ്രായം.”– ബെഞ്ച് ഉത്തരവിൽ പറഞ്ഞു.
എംകെ സ്റ്റാലിൻ ഉൾപ്പെടെയുള്ളവരെ തൻ്റെ യൂട്യൂബ് വീഡിയോകളിൽ വിമർശിച്ചതിന് സട്ടൈ ദുരൈമുരുകനെ 2021ൽ തമിഴ്‌നാട് പോലീസ് അറസ്റ്റ് ചെയ്തിരുന്നു. അപകീർത്തികരമായ പരാമർശങ്ങൾ ഒഴിവാക്കാനുള്ള ഉപാധികളോടെയാണ് മദ്രാസ് ഹൈക്കോടതി ആദ്യം ജാമ്യം അനുവദിച്ചത്. 2022 ജൂണിൽ, സംസ്ഥാന സർക്കാരിൻ്റെ അപേക്ഷയെത്തുടർന്ന് ജാമ്യം റദ്ദാക്കി. നേരത്തെ വാഗ്ദാനം നൽകിയിട്ടും ദുരൈമുരുകൻ അപകീർത്തികരമായ പരാമർശങ്ങൾ തുടർന്നുവെന്ന് ഹർജിയിൽ ചൂണ്ടിക്കാട്ടി. തമിഴ്‌നാട് സർക്കാരിന് തിരിച്ചടി നൽകിയാണ് സുപ്രീംകോടതി ഇപ്പോൾ ജാമ്യം റദ്ദാക്കിയ നടപടി റദ്ദാക്കിയത്.
