ഇലക്ടറൽ ബോണ്ടുകൾ വാങ്ങിയവരിൽ പ്രമുഖ സ്ഥാപനങ്ങൾ കഴിഞ്ഞ അഞ്ച് വർഷത്തിനിടയിൽ എൻഫോഴ്‌സ്‌മെൻ്റ് ഡയറക്ടറേറ്റിൻ്റെ അല്ലെങ്കിൽ ആദായ നികുതി വകുപ്പിൻ്റെ നിരീക്ഷണത്തിൽ ഉണ്ടായിരുന്നവയോ ഏജൻസികളുടെ പരിശോധനാ ഭീഷണി നേരിട്ടവയോ ആയിരുന്നു എന്ന ഞെട്ടിക്കുന്ന വസ്തുത പുറത്തു വരുന്നു.
ഇലക്ടറൽ ബോണ്ടുകൾ വാങ്ങിയവരുടെ പട്ടികയിലെ ഗണ്യമായ എണ്ണം കമ്പനികൾ ആ ബോഡുകൾ വാങ്ങിയ സന്ദർഭങ്ങളും പ്രസക്തമാണ്. ചില മാധ്യമങ്ങളുടെ അന്വേഷണത്തില്‍ തെളിഞ്ഞത് പ്രമുഖ കമ്പനികള്‍ വലിയ തുകയുടെ ബോണ്ടുകള്‍ വാങ്ങിയത് അവരെ ഐ.ടി. വകുപ്പോ ഇ.ഡി.യോ പരിശോധന നടത്തി സമ്മര്‍ദ്ദത്തിലാക്കിയതിനു തൊട്ടു പിന്നാലെയോ, പരിശോധന നടത്തിയേക്കുമെന്ന വാര്‍ത്ത പുറത്തു വന്നതിനു ശേഷമുള്ള തീയതികളിലോ ആണ് എന്നതാണ്.
ഫ്യൂച്ചർ ഗെയിമിംഗ് ആൻഡ് ഹോട്ടൽ സർവീസസ് പിആർ ആണ് രാഷ്ട്രീയ പാർട്ടികൾക്ക് ഇലക്ടറൽ ബോണ്ട് വഴി ഏറ്റവും കൂടുതൽ സംഭാവന നൽകിയത് –മൊത്തം 1,368 കോടി രൂപ. 2023 മെയ് മാസത്തിൽ, പ്രശസ്ത ലോട്ടറി വ്യവസായിയും കമ്പനിയുടെ മാനേജിംഗ് ഡയറക്ടറുമായ സാൻ്റിയാഗോ മാർട്ടിൻ്റെ ചെന്നൈയിലെ വസതിയിൽ ഇ.ഡി. പരിശോധന നടത്തിയിരുന്നു . കള്ളപ്പണം വെളുപ്പിക്കൽ തടയൽ നിയമത്തിൻ്റെ (പിഎംഎൽഎ) വ്യവസ്ഥകൾ പ്രകാരം കോയമ്പത്തൂരിലെ കമ്പനിയുടെ വ്യാപാര സ്ഥാപനങ്ങളിലും ഇഡി പരിശോധന നടത്തിയിരുന്നു .
ഒരു വർഷം മുമ്പ്, 2022 ഏപ്രിൽ 2 ന് കമ്പനിക്കും അതിൻ്റെ അനുബന്ധ സ്ഥാപനങ്ങൾക്കും എതിരായ ലോട്ടറി കുംഭകോണ കേസിൽ പിഎംഎൽഎയ്ക്ക് കീഴിൽ 410 കോടി രൂപയുടെ ജംഗമ സ്വത്തുക്കൾ ഇഡി കണ്ടുകെട്ടിയിരുന്നു. രസകരമെന്നു പറയട്ടെ, അഞ്ച് ദിവസത്തിന് ശേഷം, 2022 ഏപ്രിൽ 7-ന് കമ്പനി 100 കോടി രൂപയുടെ ഇലക്ടറൽ ബോണ്ടുകൾ വാങ്ങി. ഒറ്റ തീയതിയിലെ അവരുടെ ഏറ്റവും വലിയ ഇടപാടുകളിലൊന്ന് ആണിത് . കമ്പനി വാങ്ങിയ 1,368 കോടി മൂല്യമുള്ള ബോണ്ടുകളിൽ 50 ശതമാനം ഇഡി പരിശോധനകൾക്ക് മുമ്പും ബാക്കി 50 ശതമാനം ഇഡിയുടെ പരിശോധനകൾക്കു ശേഷവുമാണ് നടത്തിയത്.
