ഇലക്ടറല് ബോണ്ട് അഴിമതിയുടെ കഥകളില് ഏറ്റവും ഞെട്ടിക്കുന്ന ഒന്നാണ് ബിജെപിക്ക് 55 കോടി രൂപ സംഭാവന നല്കിയ സില്ക്യാര ടണല് നിര്മാണ കമ്പനിയുടെത്. കഴിഞ്ഞ വര്ഷം നവമ്പറില് ഈ കമ്പനി നിര്മിച്ചുകൊണ്ടിരുന്ന ടണലിന്റെ ഒരു ഭാഗം തകര്ന്ന് 41 തൊഴിലാളികള് ആഴ്ചകളോളം കുടുങ്ങിപ്പോയ സംഭവം ആരും മറന്നു കാണില്ല. ജീവിതത്തിനും മരണത്തിനും ഇടയിലെ നൂല്പ്പാലത്തില് കുടുങ്ങിപ്പോയ ഈ തൊഴിലാളികളെ രക്ഷിക്കാന് ലോകത്തെ വിദഗ്ധര് തന്നെ ഇടപെടേണ്ടി വന്നു. ഈ തുരങ്ക നിര്മാണത്തിന്റെ ഘട്ടത്തില് തന്നെ കമ്പനിക്ക് കരാര് നീട്ടി നല്കുന്നതുള്പ്പെടെയുള്ള ഇടപാടുകള് നടത്തിയിരുന്നതായി തെളിഞ്ഞിട്ടുണ്ട്. ഇതിനുള്ള പ്രത്യുപകാരമായിരുന്നുവോ അവര് 55 തവണയായി നല്കിയ ഒരോ കോടി രൂപയുടെ സംഭാവന എന്ന ചോദ്യം ഉയരുന്നു.
ഹൈദരാബാദ് ആസ്ഥാനമായുള്ള നവയുഗ എഞ്ചിനീയറിംഗ് കമ്പനി ലിമിറ്റഡ് ആണ് ഉത്തരാഖണ്ഡിലെ ഉത്തരകാശിയിൽ സിൽക്യാര-ബർകോട്ട് തുരങ്കം നിർമ്മിച്ചത്. നവയുഗ ഗ്രൂപ്പിൻ്റെ മുൻനിര കമ്പനിയായ നവയുഗ എഞ്ചിനീയറിംഗ്, 2019 ഏപ്രിൽ 19 നും 2022 ഒക്ടോബർ 10 നും ഇടയിൽ ഒരു കോടി രൂപയുടെ 55 ഇലക്ടറൽ ബോണ്ടുകൾ വാങ്ങിയതായി ഇലക്ഷൻ കമ്മീഷൻ ഡാറ്റ വെളിപ്പെടുത്തുന്നു.
തുരങ്കത്തിൻ്റെ നിർമ്മാണം 2022-ൽ പൂർത്തിയാകേണ്ടതായിരുന്നു, എന്നാൽ അതിൻ്റെ സമയപരിധി നീട്ടി നൽകി. നാല് പുണ്യ തീർത്ഥാടന കേന്ദ്രങ്ങളിലേക്കുള്ള കണക്റ്റിവിറ്റി മെച്ചപ്പെടുത്താൻ ലക്ഷ്യമിട്ടുള്ള കേന്ദ്രത്തിൻ്റെ 900 കിലോമീറ്റർ ചാർ ധാം യാത്ര ഓൾ വെതർ റോഡിൻ്റെ ഭാഗമായിരുന്നു 4.5 കിലോമീറ്റർ തുരങ്കം. 2023 നവംബറിൽ ദീപാവലി ദിനത്തിൽ, നിർമ്മാണത്തിലിരിക്കുന്ന തുരങ്കത്തിൻ്റെ ഒരു ഭാഗം തകർന്ന് 41 തൊഴിലാളികൾ അവശിഷ്ടങ്ങൾക്കിടയിൽ കുടുങ്ങിപ്പോയ വലിയ അപകടമുണ്ടായി . 400 മണിക്കൂർ നീണ്ട രക്ഷാപ്രവർത്തനത്തിനൊടുവിൽ നവംബർ 28നാണ് കുടുങ്ങിയ തൊഴിലാളികളെ തുരങ്കത്തിൽ നിന്ന് പുറത്തെടുത്തത്.
