മധ്യപ്രദേശ് മുൻ മുഖ്യമന്ത്രി കമൽനാഥും അദ്ദേഹത്തിൻ്റെ മകൻ നകുൽ നാഥ് എംപിയും ബിജെപിയിൽ ചേരുമെന്ന അഭ്യൂഹങ്ങൾ തിങ്കളാഴ്ച ഉച്ചയോടെ അവസാനിച്ചു. കമൽ നാഥ് പാർട്ടി വിടില്ല. നകുൽനാഥ് കോൺഗ്രസ് ടിക്കറ്റിൽ ചിന്ദ്വാരയിൽ നിന്ന് മത്സരിക്കും.
“ആരും എങ്ങോട്ടും പോകുന്നില്ലെന്ന് കമൽനാഥ് ജി പറയുന്നു. കോൺഗ്രസിനെ ആൽമരമാക്കിയവർ എങ്ങനെ അത് ഉപേക്ഷിക്കും” –തിങ്കളാഴ്ച കമൽനാഥുമായുള്ള കൂടിക്കാഴ്ചയ്ക്ക് ശേഷം കമൽ നാഥിന്റെ ഏറ്റവും വിശ്വസ്തനായ മുൻ മന്ത്രി സജ്ജൻ വർമ പറഞ്ഞു. രാഹുൽ ഗാന്ധിയുമായും കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെയുമായും കമൽനാഥ് സംസാരിച്ചതായി സജ്ജൻ വർമ പറഞ്ഞു.
“പാർട്ടി വിടുന്നതിനെക്കുറിച്ച് ചിന്തിച്ചിട്ടില്ലെന്ന് കമൽനാഥ് പറഞ്ഞു . മധ്യപ്രദേശിലെ 29 ലോക്‌സഭാ സീറ്റുകളിൽ ജാതി സമവാക്യം എങ്ങനെയായിരിക്കും എന്നതിലാണ് ഇപ്പോൾ അദ്ദേഹത്തിൻ്റെ ശ്രദ്ധ. കമൽനാഥ് ബിജെപിയിൽ ചേരുമെന്ന ചർച്ച മാധ്യമങ്ങളുടെ സൃഷ്ടിയാണ്. അദ്ദേഹം എങ്ങും പോകുന്നില്ല.”– വർമ പറഞ്ഞു. കമൽനാഥ് ബിജെപിയിൽ ചേരുമെന്ന വാർത്തയെക്കുറിച്ച് ചോദിച്ചപ്പോൾ, ‘ഇതെല്ലാം കിംവദന്തികളാണ്, കമൽനാഥ് ഒരിക്കലും ഇങ്ങനെയൊന്നും പറഞ്ഞിട്ടില്ല. അദ്ദേഹം പാർട്ടിയുടെ സ്വത്താണ് എന്നായിരുന്നു കോൺഗ്രസ് നേതാവ് ഉമംഗ് സിംഘാർ പ്രതികരിച്ചത്.
മധ്യപ്രദേശ് നിയമസഭാ തിരഞ്ഞെടുപ്പില്‍ കമല്‍നാഥ് ഏകപക്ഷീയമായി തീരുമാനമെടുത്ത് പ്രവര്‍ത്തിച്ചതു മൂലം വന്‍ പരാജയത്തിലേക്ക് കോണ്‍ഗ്രസ് പതിച്ചത് കമല്‍നാഥിന്റെ നില പരുങ്ങലിലാക്കിയിരുന്നു. തുടര്‍ന്ന് കമല്‍നാഥിനെ പാര്‍ടിയുടെ എല്ലാ ചുമതലയില്‍ നിന്നും നീക്കം ചെയ്യുകയുണ്ടായി.
മാത്രമല്ല, ഒഴിവു വന്ന രാജ്യസഭാ സീറ്റ് തനിക്ക് തരണമെന്ന കമല്‍നാഥിന്റെ ആവശ്യം നിരസിച്ച കോണ്‍ഗ്രസ്, സീറ്റ് കമല്‍നാഥിന്റെ എതിരാളിയായ ദിഗ്വിജയ് സിങിന്റെ വിശ്വസ്തന് നല്‍കുകയും ചെയ്തു. ഇതോടെയാണ് കമല്‍നാഥ് ബിജെപി പാളയത്തിലേക്ക് പോകാനുള്ള സമ്മര്‍ദ്ദ തന്ത്രവുമായി ഇറങ്ങിയത്. ഇന്ദിരാഗാന്ധിയുടെ പിറക്കാത്ത മകന് എന്ന വിശേഷണമുള്ള കമല്‍നാഥ് ബിജെപിയിലേക്ക് നീങ്ങിയാല്‍ അത് തനിച്ചാവില്ലെന്ന പ്രചാരണവും ശക്തമായിരുന്നു. കമല്‍നാഥും മകനും ഇന്നലെ ഡല്‍ഹിയിലെത്തിയത് അഭ്യൂഹങ്ങള്‍ക്ക് നിറം പകരുകയും ചെയ്തു.
സംസ്ഥാന ചുമതലയുള്ള ഭൻവർ ജിതേന്ദ്ര സിംഗിനാണ് ഐക്യ സമവാക്യം നടപ്പാക്കാനുള്ള ശ്രമത്തിന്റെ ചുമതല. ജിതേന്ദ്ര സിംഗ് ചൊവ്വാഴ്ച ഭോപ്പാലിലെത്തും. എംഎൽഎമാരുമായി ഒന്നൊന്നായി ചർച്ച ചെയ്യും. രാവിലെ 10.30ന് യോഗം ആരംഭിക്കും. ലോക്‌സഭാ തിരഞ്ഞെടുപ്പും ഭാരത് ജോഡോ ന്യായ് യാത്രയും ചർച്ച ചെയ്യാനാണ് എംഎൽഎമാരെ വിളിച്ചിരിക്കുന്നതെന്നാണ് സൂചന.
കമൽ നാഥ് തൻ്റെ ഡൽഹി ബംഗ്ലാവിൽ നേരത്തെ ഒരു യോഗം നടത്തിയിരുന്നു, അതിൽ മധ്യപ്രദേശ് എംഎൽഎമാരും മുൻ എംഎൽഎമാരും മുതിർന്ന നേതാക്കളും പങ്കെടുത്തു. ഡൽഹിയിലെ കമൽനാഥിൻ്റെ ബംഗ്ലാവിൽ ഇന്നലെ മുതൽ സ്ഥാപിച്ചിരുന്ന ജയ് ശ്രീറാം പതാക ഇന്ന് രാവിലെ നീക്കം ചെയ്‌തെങ്കിലും ഉച്ചയോടെ വീണ്ടും സ്ഥാപിച്ചു. രാജ്യത്ത് വിദ്വേഷം പടർത്താനുള്ള ചിന്തയ്‌ക്കെതിരെ കമൽനാഥ് വളരെക്കാലമായി പോരാടുന്നയാളാണെന്ന് കോൺഗ്രസ് എംപി രാജ്മണി പട്ടേൽ പറഞ്ഞു. അദ്ദേഹം ബിജെപിയിൽ ചേരുമെന്ന് പ്രതീക്ഷിക്കാൻ പ്രയാസമാണ്.- പട്ടേൽ പ്രതികരിച്ചു.
