വിഘടനവാദി നേതാവ് മസരത്ത് ആലം ഭട്ടിന്റെ നേതൃത്വത്തിലുള്ള മുസ്ലീം ലീഗ് ജമ്മു കശ്മീർ എന്ന സംഘടനയെ തീവ്രവാദ വിരുദ്ധ നിയമപ്രകാരം സർക്കാർ നിരോധിത സംഘടനയായി പ്രഖ്യാപിച്ചു.
രാജ്യത്ത് ഭീകരവാഴ്ച സൃഷ്ടിക്കുക എന്ന ഉദ്ദേശത്തോടെ ജമ്മു കശ്മീരിൽ ദേശവിരുദ്ധ, വിഘടനവാദ പ്രവർത്തനങ്ങളിൽ സംഘടനയുടെ പങ്കാളിത്തമുള്ളതിനാലാണ് നിരോധനമെന്ന് കേന്ദ്ര ആഭ്യന്തര മന്ത്രാലയം അറിയിച്ചു. ജമ്മു കശ്മീരിന് ഇന്ത്യയിൽ നിന്ന് സ്വാതന്ത്ര്യം നേടുക, പാകിസ്ഥാനുമായി ലയിപ്പിക്കുക, ഇസ്ലാമിക ഭരണം സ്ഥാപിക്കുക എന്നിവയാണ് മുസ്ലീം ലീഗ് ജമ്മു കശ്മീരിന്റെ (മസറത്ത് ആലം വിഭാഗം) ലക്ഷ്യമെന്ന് കേന്ദ്ര ആഭ്യന്തര മന്ത്രാലയം ഒരു വിജ്ഞാപനത്തിൽ വ്യക്തമാക്കി.
“അവരുടെ നിയമവിരുദ്ധ പ്രവർത്തനങ്ങൾ ഇന്ത്യയുടെ അഖണ്ഡത, പരമാധികാരം, സുരക്ഷ, സാമുദായിക സൗഹാർദം എന്നിവ തകർക്കുന്നു. മാത്രമല്ല മുസ്ലീം ലീഗ് ജമ്മു കശ്മീരിന് നിരോധിത ഭീകര സംഘടനകളുമായി ബന്ധമുണ്ടെന്ന് സൂചനയുണ്ട്”– കേന്ദ്ര ആഭ്യന്തര മന്ത്രാലയം പറഞ്ഞു.
