മലയാള മനോരമ ഗ്രൂപ്പിലെ ഇംഗ്ലീഷ് വാരികയായ ദി വീക്കിലെ പ്രമുഖ കോളമിസ്റ്റ് ബിബേക് ദെബ്രോയ് വാരികയിലെ കോളമെഴുത്ത് അവസാനിപ്പിച്ചതായി മാനേജ് മെന്റിന് കത്തെഴുതി. തന്റെ കോളത്തിനൊപ്പം വാരികയില് നല്കിയ പെയിന്റിങും കോളത്തിനു നല്കിയ തലക്കെട്ടും മതവികാരം വ്രണപ്പെടുത്തുന്നു എന്ന് ആരോപിച്ചാണ് . ബിബേക് ദ വീക്കില് എഴുതുന്നത് അവസാനിപ്പിക്കുന്നതായി മനോരമ എഡിറ്റര്ക്ക് കത്തെഴുതിയത്. ഇതിനു പിന്നാലെ ഉത്തര്പ്രദേശിലെ കാണ്പൂരില് പൊലീസ് ദ വീക്കിനെതിരെ കേസെടുത്തു. വാരികയുടെ കോപ്പികള് ബജ്രംഗ് ദള് കത്തിക്കുകയും ചെയ്തു. പ്രധാനമന്ത്രി നരേന്ദ്രമോദിയുടെ സാമ്പത്തിക ഉപദേശകസമിതിയുടെ അധ്യക്ഷനാണ് ദ വീക്കില് കോളമെഴുത്തുകാരനായ ബിബേക് ദെബ്രോയ്. മതവികാരം വ്രണപ്പെടുത്തിയെന്നാരോപിച്ച് ബി.ജെ.പി. യു.പി ഘടകം വൈസ് പ്രസിഡണ്ടിന്റെ പരാതിയിലാണ് വാരികയുടെ ഉടമകള്ക്കെതിരെ പൊലീസ് കേസെടുത്തിരിക്കുന്നത്.
ടങ് ഓഫ് ഫയര് എന്ന തലക്കെട്ടില് എഴുതിയ കോളമാണ് വിവാദത്തിനടിസ്ഥാനം. ജൂലായ് 24-ന്റെ ലക്കത്തില് പ്രസിദ്ധീകരിച്ച കോളത്തിനൊപ്പം ഹിമാചല് പ്രദേശിലെ കാങ്ഗ്ര പെയിന്റിങിന്റെ ചിത്രം നല്കിയിട്ടുണ്ട്. നഗ്നരൂപത്തില് നിലത്ത് ശയിക്കുന്ന ഇളം നിറത്തിലുള്ള ഭഗവാന് പരമശിവന്റെ മുകളില് കാളി നില്ക്കുന്നതായി ചിത്രീകരിച്ചിട്ടുള്ള 1820-ലെ പെയിന്റിങാണിത്. ഉത്തേരേന്ത്യയില് ഈ തരം ചിത്രീകരണങ്ങള് അസാധാരണമല്ല. 18,19 നൂറ്റാണ്ടുകളില് ഇത്തരം ചിത്രീകരണങ്ങള് ഉണ്ടായിട്ടുണ്ട്. ഇത്തരം ഒരു ചിത്രം 2016-ല് രാജസ്ഥാനില് ലേലത്തില് വിറ്റു പോയിട്ടുണ്ട്.
എന്നാല് താന് ഉദ്ദേശിക്കാത്ത അര്ഥം ഉണ്ടാക്കാന് മനപൂര്വ്വം ചിത്രം ഉപയോഗിക്കുകയാണ് വാരിക ചെയ്തതെന്നാണ് ബിബേക് ആരോപിച്ചത്.
” ലേഖനത്തിന്റെ ഉള്ളടക്കത്തോട് ചിത്രം ചേര്ത്തു വെച്ചത് താന് ഉദ്ദേശിച്ച അര്ഥത്തിലല്ല. ഇതൊരു തന്ത്രാധിഷ്ഠിത പെയിന്റിങ് ആണ്. ലേഖനത്തിനായി നല്കാന് ഇത് തിരഞ്ഞെടുത്ത് തെറ്റായ അര്ഥം നല്കുന്നു. തന്റെ ലേഖനത്തിന് ഈ ചിത്രം താന് ഉദ്ദേശിച്ചിട്ടുള്ളതല്ല -ബിബേക് ദെബ്രോയ് മനോരമ എഡിറ്റര് ഫിലിപ്പ് മാത്യുവിന് അയച്ച കത്തില് പറഞ്ഞു. കത്ത് അദ്ദേഹം ട്വിറ്ററില് പ്രസിദ്ധീകരിച്ചിട്ടുണ്ട്. മനോരമയുടെ പ്രസിദ്ധീകരണവുമായി ഉണ്ടായിരുന്ന വിശ്വാസം നഷ്ടപ്പെട്ടതായും ബിബേക് കത്തില് കുറ്റപ്പെടുത്തുന്നു. (കടപ്പാട്- ദ് വയര് വാര്ത്തയും ചിത്രവും)