കോൺഗ്രസ് പാർട്ടിയുമായും ഗാന്ധി കുടുംബവുമായുള്ള തന്റെ 55 വർഷത്തെ ബന്ധം ഉപേക്ഷിച്ചതായി കോൺഗ്രസ് മുൻ ലോക്‌സഭാ എംപി മിലിന്ദ് ദേവ്‌റ ഞായറാഴ്ച പ്രഖ്യാപിച്ചു. മഹാരാഷ്ട്ര മുഖ്യമന്ത്രി ഏകനാഥ് ഷിൻഡെയുടെ സാന്നിധ്യത്തിൽ അദ്ദേഹം ശിവസേനയിൽ ചേർന്നു. തന്റെ പിതാവിന്റെ കോൺഗ്രസ് പാർട്ടി ഇപ്പോൾ അവശേഷിക്കുന്നില്ല എന്നും പാർട്ടി അതിന്റെ അടിസ്ഥാന ആശയങ്ങളിൽ നിന്ന് വ്യതിചലിച്ചുവെന്നും മിലിന്ദ് ദേവ്‌റ ആരോപിച്ചു. അതേസമയം സീറ്റ് നല്‍കാതിരുന്നതാണ് മിലിന്ദ് പാര്‍ടി വിട്ടുപോകാന്‍ കാരണമെന്ന് പറയപ്പെടുന്നു.
വേർപിരിയാനുള്ള തീരുമാനം വളരെ വൈകാരികമാണെന്ന് തന്റെ തീരുമാനം വിശദീകരിച്ചുകൊണ്ട് മിലിന്ദ് ദിയോറ പറഞ്ഞു. മുഖ്യമന്ത്രി ഏകനാഥ് ഷിൻഡെയുടെ ഔദ്യോഗിക വസതിയായ വർഷ ബംഗ്ലാവിൽ 20 മുൻ കോൺഗ്രസ് കോർപ്പറേറ്റർമാർ, വ്യാപാര സംഘടനകൾ, പ്രവർത്തകർ എന്നിവർക്കൊപ്പമാണ് മിലിന്ദ് ദിയോറ ശിവസേനയിൽ (ഷിൻഡെ വിഭാഗം) ചേർന്നത്.
ദേവ്‌റയുടെ പിതാവ് മുരളി ദേവ്‌റ മുൻ കേന്ദ്രമന്ത്രിയും മുൻ മുംബൈ കോൺഗ്രസ് അധ്യക്ഷനുമായിരുന്നു, ഗാന്ധി കുടുംബവുമായി അദ്ദേഹം വളരെ അടുപ്പത്തിലായിരുന്നു. നല്ലതും ചീത്തയുമായ സമയങ്ങളിൽ ഗാന്ധി കുടുംബത്തോട് എന്നും വിശ്വസ്തത പുലർത്തിയ കോൺഗ്രസ് പാർട്ടിയുടെ ശക്തരിൽ ഒരാളായിരുന്നു മുരളി ദേവ്‌റ.
