ദേശീയ രാഷ്ട്രീയത്തില്‍ തന്ത്രങ്ങള്‍ മെനഞ്ഞ് പ്രതിപക്ഷസഖ്യത്തിന്റെ ചാമ്പ്യനാകാനുള്ള നീക്കത്തില്‍ സ്വന്തം പാര്‍ടിയുടെ പേര് പോലും മാറ്റി ഇറങ്ങിയിരിക്കുന്ന തെലങ്കാന മുഖ്യമന്ത്രി ചന്ദ്രശേഖര്‍ റാവു ഇന്ത്യയിലെ പ്രതിപക്ഷ മുഖ്യമന്ത്രിമാരെയും ഒരുമിച്ച് അണിനിരത്താൻ ശ്രമിക്കുന്നു.
ബുധനാഴ്ച തെലങ്കാനയിലെ ഖമ്മത്ത് നടക്കുന്ന ഭാരത് രാഷ്ട്ര സമിതിയുടെ (ബിആർഎസ്) പൊതുയോഗത്തിൽ പങ്കെടുക്കാൻ മൂന്ന് സംസ്ഥാനങ്ങളിലെ മുഖ്യമന്ത്രിമാർ ചൊവ്വാഴ്ച രാത്രി ഹൈദരാബാദിലെത്തും.
2022 ഒക്ടോബറിൽ ഭരണകക്ഷിയായ തെലങ്കാന രാഷ്ട്ര സമിതി (ടിആർഎസ്) ബിആർഎസ് എന്ന് പുനർനാമകരണം ചെയ്യപ്പെട്ടതിന് ശേഷം സംഘടിപ്പിക്കുന്ന ആദ്യത്തെ വലിയ പൊതുയോഗമാണിത്.
കേരള മുഖ്യമന്ത്രി പിണറായി വിജയൻ, ഡൽഹിയിലെ അരവിന്ദ് കെജ്രിവാൾ, പഞ്ചാബിലെ ഭഗവന്ത് സിംഗ് മാൻ, സമാജ്‌വാദി പാർട്ടി അധ്യക്ഷനും ഉത്തർപ്രദേശ് മുൻ മുഖ്യമന്ത്രിയുമായ അഖിലേഷ് യാദവ്, സിപിഐ ദേശീയ സെക്രട്ടറി ഡി രാജ എന്നിവർ ബിആർഎസ് മേധാവിയും തെലങ്കാന മുഖ്യമന്ത്രിയുമായ കെ ചന്ദ്രശേഖർ റാവുവുമായി ബുധനാഴ്ച പ്രഗതിഭവനിൽ ദേശീയ രാഷ്ട്രീയം ചർച്ച ചെയ്യും. പിന്നീട് പ്രധാന നേതാക്കളെല്ലാം ഹെലികോപ്റ്ററിൽ യാദാദ്രി ക്ഷേത്രത്തിലേക്ക് പോകും. ശ്രീലക്ഷ്മി നരസിംഹ സ്വാമിയുടെ സങ്കേതമായ യാദാദ്രിയിൽ നിന്ന് അവർ ഖമ്മത്തേക്ക് പോകും.
