കെ.ആര്‍.നാരായണന്‍ നാഷണൽ ഇൻസ്റ്റിറ്റ്യൂട്ട് ഓഫ് വിഷ്വൽ സയൻസ് ആൻഡ് ആർട്‌സിലെ ജാതി വിവേചന വിവാദം പുതിയ തലത്തിലേക്ക്. ഫാക്കൽറ്റി അംഗം എം.ജി.ജ്യോതിഷിനെതിരായ ആരോപണങ്ങൾ അടിസ്ഥാനരഹിതവും അപലപനീയവുമാണെന്ന് ചൂണ്ടിക്കാട്ടി ഒരു വിഭാഗം വിദ്യാർഥികൾ ഇൻസ്റ്റിറ്റ്യൂട്ട് ചെയർമാനും പ്രശസ്ത ചലച്ചിത്രകാരനുമായ അടൂർ ഗോപാലകൃഷ്ണന് തുറന്ന കത്തെഴുതി.
ന്യൂ ഇന്ത്യൻ എക്സ്പ്രസ്സ് പത്രത്തിന് നൽകിയ അഭിമുഖത്തിൽ ആക്ടിംഗ് ഡിപ്പാർട്ട്‌മെന്റിലെ ഫാക്കൽറ്റി അംഗമായ അധ്യാപകൻ ജ്യോതിഷ് മടിയനാണെന്നു അടൂർ ആരോപിച്ചിരുന്നു. ജ്യോതിഷിനെതിരെയുള്ള പരാമർശം ജാതീയമായ വൈകാരികതയിൽ നിന്നും ഉണ്ടായതാണെന്ന് വിദ്യാർത്ഥികൾ കത്തിൽ ആരോപിക്കുന്നു. അടൂരിന്റെ ആരോപണത്തെ ശക്തമായി തള്ളിക്കളഞ്ഞ ആക്ടിംഗ് ഡിപ്പാർട്ട്‌മെന്റിലെ ഇപ്പോഴത്തെ ബാച്ചിലെ വിദ്യാർത്ഥികൾ, ജ്യോതിഷ് മലയാള സിനിമയിലെ നിരവധി മികച്ച അഭിനേതാക്കളെ പരിശീലിപ്പിച്ചിട്ടുണ്ടെന്നും അദ്ദേഹത്തിന്റെ മാർഗ്ഗനിർദ്ദേശത്തിൽ ഡിപ്പാർട്ട്‌മെന്റിലെ വിദ്യാർത്ഥികളും മികച്ച നിലവാരം പുലർത്തിയിട്ടുണ്ടെന്നും പറഞ്ഞു. അടൂരിന്റെ വാക്കുകൾ കേൾക്കുന്ന ആർക്കും ജ്യോതിഷിനെ വിമർശിച്ചതിന് പിന്നിലെ വികാരം മനസ്സിലാകുമെന്ന് വിദ്യാർത്ഥികൾ തുറന്ന കത്തിൽ പറഞ്ഞു.
“ഇത്തരമൊരു അധ്യാപകനെ മന്ദബുദ്ധിയായി മുദ്രകുത്തി നിങ്ങളുടെ മനസ്സിലും സ്ഥാപനത്തിനകത്തും ജാതി എങ്ങനെ പ്രവർത്തിക്കുന്നുവെന്ന് പൊതുജനങ്ങൾക്ക് മനസ്സിലാക്കിത്തന്നതിന് വളരെ നന്ദി. അധ്യാപകൻ എത്ര നല്ലവനാണെങ്കിലും, അവൻ ഒരു പിന്നോക്ക സമുദായത്തിൽ പെട്ടവനാണെങ്കിൽ, അവനെ കാസ്റ്റ് ചെയ്യപ്പെടും.” കത്തിൽ പറയുന്നു.
ഇൻസ്റ്റിറ്റ്യൂട്ടിലെ പല ഡിപ്പാർട്ട്‌മെന്റുകളിലും മികവില്ലാത്തവരും അധ്യാപന പരിചയമില്ലാത്തവരുമായ അധ്യാപകരുണ്ടെന്ന് അടൂരിന് അറിയാമായിരുന്നെന്ന് വിദ്യാർഥികൾ ആരോപിച്ചു. മതിയായ അനുഭവപരിചയമില്ലാത്ത അധ്യാപകരെ കുറിച്ച് നിരവധി തവണ പരാതിപ്പെട്ടിട്ടുണ്ടെന്നും പ്രതിഷേധ സൂചകമായി അത്തരം അധ്യാപകരുടെ ക്ലാസുകൾ ബഹിഷ്‌കരിച്ചതായും വിദ്യാർത്ഥികൾ പറഞ്ഞു.
“എന്നിട്ടും, നിങ്ങൾ വിദ്യാർത്ഥികളോട് ഇതേക്കുറിച്ച് ചോദിക്കുകയോ അത്തരം അധ്യാപകർക്കെതിരെ നടപടിയെടുക്കുകയോ ചെയ്തിട്ടില്ല. ജ്യോതിഷ് സർ കഴിഞ്ഞ എട്ട് വർഷമായി ഇൻസ്റ്റിറ്റ്യൂട്ടിലെ അധ്യാപകനാണ്, ഈ കാലയളവിൽ അദ്ദേഹത്തിന്റെ അധ്യാപനത്തിനെതിരെ ഒരു പരാതിയും ഉയർന്നിട്ടില്ല”– കത്തിൽ പറഞ്ഞു.
2019 ബാച്ചിന്റെ അഭ്യർത്ഥനയുടെ അടിസ്ഥാനത്തിൽ പാൻഡെമിക് കാലയളവിൽ ഓൺലൈൻ പ്രാക്ടിക്കൽ ക്ലാസുകൾ റദ്ദാക്കിയതായി വിദ്യാർത്ഥികൾ പറഞ്ഞു. ഇക്കാര്യം ഇൻസ്റ്റിറ്റ്യൂട്ട് ഡയറക്ടറെ രേഖാമൂലം അറിയിച്ചിരുന്നു . രാജ്യത്തെ ഏറ്റവും മികച്ച ഒരു സ്ഥാപനത്തിൽ പഠിച്ച താങ്കൾക്ക് അഭിനയം ഓൺലൈനിൽ പഠിക്കുന്നതിന്റെ പരിമിതി മനസ്സിലാക്കാൻ കഴിയാത്തതിൽ ഖേദമുണ്ട്” –വിദ്യാർഥികൾ അടൂരിനെഴുതിയ കത്തിൽ പറയുന്നു.
