കോൺഗ്രസ് നേതാക്കളായ രാഹുൽ ഗാന്ധിയും പ്രിയങ്കാ ഗാന്ധിയും ഉത്തർപ്രദേശിലെ അമേഠി, റായ്ബറേലി ലോക്‌സഭാ സീറ്റുകളിൽ മത്സരിക്കുമോ എന്നതിനെക്കുറിച്ചുള്ള സസ്‌പെൻസ് വ്യാഴാഴ്ച അവസാനിക്കും. 24-30 മണിക്കൂറിനുള്ളിൽ ഇക്കാര്യത്തിൽ തീരുമാനം പ്രഖ്യാപിക്കുമെന്ന് കോൺഗ്രസ് ജനറൽ സെക്രട്ടറി ജയറാം രമേശ് ബുധനാഴ്ച പറഞ്ഞു.
അമേഠിയിൽ നിന്നോ റായ്ബറേലിയിൽ നിന്നോ മത്സരിക്കാൻ കോൺഗ്രസ് നേതാവ് രാഹുൽ ഗാന്ധി തയ്യാറല്ലെന്നും കുടുംബാംഗങ്ങളെ ആരെയും ഈ സീറ്റുകളിൽ മത്സരിപ്പിക്കാൻ അദ്ദേഹം ആഗ്രഹിക്കുന്നില്ലെന്നും ഒരു വാർത്ത ഉണ്ടായേക്കാമെന്ന് രഹസ്യ വർത്തമാനം പരന്നിട്ടുണ്ട് . ഈ രണ്ട് പ്രധാന മണ്ഡലങ്ങളിൽ മെയ് 20 ന് ആണ് വോട്ടെടുപ്പ്.
പാർട്ടി അധ്യക്ഷൻ മല്ലികാർജുൻ ഖാർഗെ അമേഠിയിൽ രാഹുൽ ഗാന്ധിയെ സമ്മതിപ്പിക്കാൻ ശ്രമിച്ചു കൊണ്ടിരിക്കുകയാണെന്ന് എന്നാൽ രാഹുലിൻ്റെ മനസ്സ് അതല്ലെന്നും എന്ന് പേരു വെളിപ്പെടുത്താത്ത ഒരു കോൺഗ്രസ് പ്രവർത്തകൻ ഒരു ദേശീയ മാധ്യമത്തോട് പറഞ്ഞു.
അടുത്തിടെ റായ്ബറേലിയിൽ നിന്ന് മത്സരിക്കാൻ രാഹുൽ ഗാന്ധി ഏറെക്കുറെ സമ്മതിച്ചിരുന്നുവെങ്കിലും പിന്നീട് ആ തീരുമാനത്തിൽ നിന്ന് പിന്മാറിയെന്നും പറയുന്നു. രാഹുൽ ഗാന്ധി റായ്ബറേലിയിൽ മത്സരിക്കാൻ സാധ്യതയുണ്ടെന്ന് പേര് വെളിപ്പെടുത്താത്ത വൃത്തങ്ങൾ വാർത്താ ഏജൻസിയായ പിടിഐയോട് പറഞ്ഞു.
റായ്ബറേലി മണ്ഡലത്തിൽ നിന്ന് മത്സരിക്കാൻ പ്രിയങ്കാ ഗാന്ധിക്കും താൽപ്പര്യമുണ്ടെന്നും എന്നാൽ കോൺഗ്രസ് നേതൃത്വത്തിനെതിരെ പ്രധാനമന്ത്രി നരേന്ദ്രമോദി നടത്തുന്ന കുടുംബവംശ രാഷ്ട്രീയത്തെക്കുറിച്ചുള്ള വിമർശനം കണക്കിലെടുത്ത് രാഹുൽ ഗാന്ധി തീരുമാനത്തെ എതിർക്കുകയാണെന്നും കോൺഗ്രസ് അകത്തളത്തിൽ വാർത്തയുണ്ട്.
ലോക്‌സഭാ തെരഞ്ഞെടുപ്പിൻ്റെ അഞ്ചാം ഘട്ടത്തിൽ നാമനിർദ്ദേശ പത്രിക സമർപ്പിക്കാനുള്ള അവസാന തീയതിയായ മെയ് 3 ന് പൂനെയിൽ ഒരു റാലിയെ അഭിസംബോധന ചെയ്യാനാണ് രാഹുൽ ഗാന്ധിയുടെ ഇപ്പോഴത്തെ പരിപാടിയിൽ ഉള്ളത്. രണ്ട് സീറ്റുകളിലേക്കുള്ള സ്ഥാനാർത്ഥിത്വം ചർച്ച ചെയ്യുന്നതിനുള്ള യോഗം ബുധനാഴ്ച നടന്നെങ്കിലും തീരുമാനമായില്ലെന്നും ഗാന്ധി കുടുംബാംഗങ്ങൾ അമേഠി, റായ്ബറേലി സീറ്റുകളിൽ മത്സരിക്കുമെന്ന് ജനങ്ങൾ പ്രതീക്ഷിക്കുന്നുണ്ടെന്നും രാഹുലിന്റെ അടുത്ത അനുയായിയായ കെ എൽ ശർമ പറഞ്ഞു.
2004 മുതൽ അതിനെ പ്രതിനിധീകരിച്ച രാഹുൽ ഗാന്ധിയുടെ കോട്ടയായിരുന്നു അമേഠി സീറ്റ്, 2019 വരെ അദ്ദേഹം തുടർച്ചയായി മൂന്ന് തവണ മണ്ഡലത്തിൽ നിന്ന് എംപിയായി തുടർന്നു, അദ്ദേഹം ഭാരതീയ ജനതാ പാർട്ടിയുടെ സ്മൃതി ഇറാനിയോട് പരാജയപ്പെട്ടു .
