ചൊവ്വാഴ്ച വടക്കുപടിഞ്ഞാറൻ പാകിസ്ഥാനിൽ ഒരു ചാവേർ ബോംബർ നടത്തിയ ആക്രമണത്തിനിടെയുണ്ടായ സ്ഫോടനത്തിൽ അഞ്ച് ചൈനീസ് പൗരന്മാർ കൊല്ലപ്പെട്ടതായി റോയിട്ടേഴ്‌സ് റിപ്പോർട്ട് ചെയ്തു. ചൊവ്വാഴ്ച തലസ്ഥാനമായ ഇസ്ലാമാബാദിൽ നിന്ന് 270 കിലോമീറ്റർ അകലെ ഒരു ചൈനീസ് കമ്പനി നിർമ്മിക്കുന്ന പ്രധാന ജലവൈദ്യുത അണക്കെട്ടിൻ്റെ സ്ഥലമായ ദാസുവിലേക്ക് വാഹനവ്യൂഹം പോകുമ്പോഴാണ് സംഭവം.
ഇസ്ലാമാബാദിൽ നിന്ന് ഖൈബർ പഖ്തൂൺഖ്വ പ്രവിശ്യയിലുള്ള ദാസുവിലെ തങ്ങളുടെ ക്യാമ്പിലേക്ക് പോവുകയായിരുന്ന ചൈനീസ് എഞ്ചിനീയർമാരുടെ വാഹനവ്യൂഹത്തിലേക്ക് സ്‌ഫോടകവസ്തുക്കൾ നിറച്ച വാഹനം ചാവേർ ഇടിച്ചുകയറ്റുകയായിരുന്നുവെന്ന് റീജിയണൽ പോലീസ് മേധാവി മുഹമ്മദ് അലി ഗന്ധപൂർ പറഞ്ഞതായി റോയിട്ടേഴ്‌സ് റിപ്പോർട്ട് ചെയ്തു. ആക്രമണത്തിൽ അഞ്ച് ചൈനീസ് പൗരന്മാരും അവരുടെ പാകിസ്ഥാൻ ഡ്രൈവറും കൊല്ലപ്പെട്ടു. ആക്രമണത്തിൻ്റെ ഉത്തരവാദിത്തം ആരും ഏറ്റെടുത്തിട്ടില്ല.
ഒരാഴ്ചയ്ക്കിടെ പാക്കിസ്ഥാനിൽ ചൈനയുടെ സംവിധാനങ്ങൾക്ക് നേരെ നടക്കുന്ന മൂന്നാമത്തെ വലിയ ആക്രമണമാണിത്. ആദ്യ രണ്ട് ആക്രമണങ്ങൾ ബലൂചിസ്ഥാനിലെ തെക്കുപടിഞ്ഞാറൻ പ്രവിശ്യയിലെ ഒരു വ്യോമതാവളത്തിലും തന്ത്രപ്രധാനമായ തുറമുഖത്തിലും ആയിരുന്നു. ചൈന പാകിസ്ഥാനിൽ അടിസ്ഥാന സൗകര്യ പദ്ധതികളിൽ കോടിക്കണക്കിന് നിക്ഷേപം നടത്തുന്ന ഘട്ടത്തിലാണ് ഈ ആക്രമണങ്ങൾ എന്നത് ശ്രദ്ധേയമാണ്.
പടിഞ്ഞാറൻ പ്രവിശ്യയായ ഖൈബർ-പക്തുൻഖ്വയിൽ ബെയ്ജിംഗിൻ്റെ ബെൽറ്റ് ആൻഡ് റോഡ് ഇനീഷ്യേറ്റീവിൻ്റെ ഭാഗമായി ചൈനീസ് എഞ്ചിനീയർമാരും പാകിസ്ഥാൻ നിർമ്മാണ തൊഴിലാളികളും വർഷങ്ങളായി ജലവൈദ്യുത പദ്ധതികളിൽ പ്രവർത്തിക്കുന്നു.
പാകിസ്താനിലെ സുപ്രധാന അണക്കെട്ട് പദ്ധതിയുടെ ആസ്ഥാനമായ ദാസു മുമ്പും ആക്രമണങ്ങളുടെ ലക്ഷ്യമായിരുന്നു. 2021ൽ ദാസുവിലുണ്ടായ ആക്രമണത്തിൽ രണ്ട് പാകിസ്ഥാൻ കുട്ടികളും ഒമ്പത് ചൈനീസ് പൗരന്മാരും കൊല്ലപ്പെട്ടിരുന്നു.
സംഭവം “ആത്മഹത്യാ സ്ഫോടനം” ആണെന്നും ബന്ധപ്പെട്ട അധികാരികൾ തെളിവുകൾ ശേഖരിക്കുകയാണെന്നും ബിഷാം സ്റ്റേഷൻ ഹൗസ് ഓഫീസർ ഭക്ത് സാഹിർ പറഞ്ഞു. ചാവേറിൻ്റെ വാഹനം എവിടെ നിന്ന്, എങ്ങനെ വന്നുവെന്നും അത് എങ്ങനെ സംഭവിച്ചുവെന്നും അന്വേഷിക്കുമെന്നും അദ്ദേഹം അറിയിച്ചു.
