വിവിധ വികസന പദ്ധതികളുടെ ഉദ്ഘാടനത്തിനായി പ്രധാനമന്ത്രി നരേന്ദ്ര മോദി ഇന്ന് അസം, അരുണാചൽ പ്രദേശ് തുടങ്ങിയ അതിർത്തി സംസ്ഥാനങ്ങൾ സന്ദർശിക്കും. അസമിലെ കാസിരംഗ ദേശീയ ഉദ്യാനം സന്ദർശിച്ച് അരുണാചൽ പ്രദേശിലെ ഇറ്റാനഗറിൽ നടക്കുന്ന ‘വിക്ഷിത് ഭാരത് വിക്ഷിത് നോർത്ത് ഈസ്റ്റ്’ പരിപാടിയിൽ പങ്കെടുത്താണ് അദ്ദേഹത്തിൻ്റെ യാത്ര ആരംഭിക്കുന്നത്. കാസിരംഗ നാഷണൽ പാർക്ക് സന്ദർശനത്തിൻ്റെ ചിത്രങ്ങൾ പ്രധാനമന്ത്രി മോദി സമൂഹ മാധ്യമത്തിൽ പങ്കിട്ടു. “ഇന്ന് രാവിലെ ഞാൻ അസമിലെ കാസിരംഗ നാഷണൽ പാർക്കിലായിരുന്നു. സമൃദ്ധമായ പച്ചപ്പിന് നടുവിൽ സ്ഥിതി ചെയ്യുന്ന ഈ യുനെസ്കോയുടെ ലോക പൈതൃക പ്രദേശം ഒറ്റക്കൊമ്പുള്ള കാണ്ടാമൃഗം ഉൾപ്പെടെയുള്ള ഗംഭീരമായ, വൈവിധ്യമാർന്ന സസ്യജന്തുജാലങ്ങളാൽ അനുഗൃഹീതമാണ്”– മോദി എക്‌സിൽ കുറിച്ചു.
അസമിലെ സുപ്രധാന പദ്ധതികളും പ്രധാനമന്ത്രി ഇന്ന് രാജ്യത്തിന് സമർപ്പിക്കും. ടിൻസുകിയയിലെ പുതിയ മെഡിക്കൽ കോളേജും ആശുപത്രിയും പ്രധാനമന്ത്രി മോദി രാജ്യത്തിന് സമർപ്പിക്കും. പ്രധാനമന്ത്രി ഊർജ ഗംഗ പദ്ധതിയുടെ ഭാഗമായ 718 കിലോമീറ്റർ ദൈർഘ്യമുള്ള 3,992 കോടി രൂപയുടെ ബറൗണി-ഗുവാഹത്തി പൈപ്പ് ലൈനിൻ്റെ ഉദ്ഘാടനവും അദ്ദേഹം നിർവഹിക്കും. കൂടാതെ പ്രധാനമന്ത്രി ആവാസ് യോജനയ്ക്ക് കീഴിൽ 8,450 കോടിചെലവഴിച്ച 5.5 ലക്ഷം വീടുകൾ പ്രധാനമന്ത്രി ഉദ്ഘാടനം ചെയ്യും. മുഗളർക്കെതിരായ വിജയത്തിന് പേരുകേട്ട അസമിലെ അഹോം രാജ്യത്തിൻ്റെ റോയൽ ആർമിയുടെ ജനറൽ ആയിരുന്ന ലച്ചിത് ബോർഫുകൻ്റെ 84 അടി ഉയരമുള്ള പ്രതിമ പ്രധാനമന്ത്രി അനാച്ഛാദനം ചെയ്യും.
മണിപ്പൂർ, മേഘാലയ, നാഗാലാൻഡ്, സിക്കിം, ത്രിപുര, അരുണാചൽ പ്രദേശ് എന്നിവിടങ്ങളിൽ 55,600 കോടി രൂപയുടെ ഒന്നിലധികം വികസന പദ്ധതികളുടെ ഉദ്ഘാടനവും സമർപ്പണവും തറക്കല്ലിടലും പ്രധാനമന്ത്രി നിർവഹിക്കും . ലോകത്തിലെ ഏറ്റവും നീളം കൂടിയ ഇരട്ട-വരി തുരങ്കമായ ‘സേല ടണൽ’ അരുണാചൽ പ്രദേശിൽ പ്രധാനമന്ത്രി മോദി ഇന്ന് ഉദ്ഘാടനം ചെയ്യും. ബോർഡർ റോഡ്‌സ് ഓർഗനൈസേഷൻ (BRO) നിർമ്മിച്ച സെല ടണൽ 13,000 അടി ഉയരത്തിലാണ്. 825 കോടി രൂപ ചെലവിൽ നിർമ്മിച്ചതാണ് ഇത് . കാലാവസ്ഥാ സാഹചര്യങ്ങൾ കണക്കിലെടുക്കാതെ ചൈനയുമായി അതിർത്തി പങ്കിടുന്ന തവാങ്ങിലേക്ക് തടസ്സമില്ലാത്ത കണക്റ്റിവിറ്റി ഉറപ്പാക്കുന്നതിനാൽ ഈ തുരങ്കത്തിന് വളരെയധികം പ്രാധാന്യമുണ്ട്.
