കോണ്‍ഗ്രസ് നേതൃത്വത്തിലുള്ള ഇന്ത്യ സഖ്യം അടിമുടി നിഷേധാത്മകമാണെന്ന് പ്രധാനമന്ത്രി നരേന്ദ്രമോദി ആഞ്ഞടിച്ചു. ഇന്ന് ദ്വാരക എക്സ്പ്രസ് വേയുടെ ഹരിയാനയിലെ പാത് ഉദ്ഘാടനം ചെയ്തുകൊണ്ടായിരുന്നു മോദിയുടെ രൂക്ഷ വിമര്‍ശനം. നിഷേധാത്മകതയില്‍ മാത്രമേ ഇന്ത്യ സഖ്യം വിശ്വസിക്കുന്നുള്ളൂ- മോദി ആക്ഷേപിച്ചു.
“രാജ്യത്ത് നടക്കുന്ന ലക്ഷക്കണക്കിന് കോടി രൂപയുടെ വികസന പ്രവർത്തനങ്ങളുടെ ഏറ്റവും വലിയ ആഘാതം നേരിടുന്നത് കോൺഗ്രസും അതിൻ്റെ ധിക്കാരപരമായ കൂട്ടുകെട്ടും മാത്രമാണ്. അവർക്ക് ഉറങ്ങാൻ കഴിയുന്നില്ല. അതുകൊണ്ടാണ് തെരഞ്ഞെടുപ്പുകാരണം ലക്ഷക്കണക്കിന് കോടി രൂപയുടെ പണിയാണ് മോദി ചെയ്യുന്നതെന്ന് അവർ പറയുന്നത്. 10 വർഷം കൊണ്ട് രാജ്യം വളരെയധികം മാറിയെങ്കിലും കോൺഗ്രസിൻ്റെയും സുഹൃത്തുക്കളുടെയും കാഴ്ചപ്പാടുകൾ മാറിയിട്ടില്ല. അവരുടെ ദർശനം ഇപ്പോഴും സമാനമാണ് – എല്ലാം നെഗറ്റീവ്”– പ്രധാനമന്ത്രി മോദി ഗുരുഗ്രാമിൽ പറഞ്ഞു.
ഏപ്രിൽ-മെയ് മാസങ്ങളിൽ നടക്കാൻ സാധ്യതയുള്ള ലോക്‌സഭാ തെരഞ്ഞെടുപ്പിന് മുന്നോടിയായി, പ്രധാനമന്ത്രി രാജ്യത്തുടനീളം നിരവധി പദ്ധതികൾ ഉദ്ഘാടനം ചെയ്തു വരികയാണ്. മോദിയെ അധികാര ഭ്രഷ്ടനാക്കും എന്ന് അവകാശപ്പെട്ട് പ്രധാന പ്രതിപക്ഷ പാർട്ടിയായ കോൺഗ്രസ് ഉൾപ്പെടെ രണ്ട് ഡസനിലധികം പ്രതിപക്ഷ പാർട്ടികൾ രൂപീകരിച്ച സഖ്യമാണ് ഇന്ത്യ.
ദ്വാരക എക്സ്പ്രസ് വേയുടെ ഹരിയാന ഭാഗം 19 കിലോമീറ്റർ ദൈർഘ്യമുള്ളതാണ്, ഏകദേശം 4100 കോടി രൂപ ചെലവിലാണ് ഇത് നിർമ്മിച്ചിരിക്കുന്നത് .
