2024ലെ ലോക്‌സഭാ തെരഞ്ഞെടുപ്പിൽ മികച്ച പ്രകടനം കാഴ്ചവെച്ചില്ലെങ്കിൽ പാർട്ടിക്ക് അതിൻ്റെ ഏറ്റവും പോപ്പുലറായ ചിഹ്നം അരിവാൾ ചുറ്റിക നക്ഷത്രം സിപിഎം നേതാവ് എ.കെ.ബാലൻ കഴിഞ്ഞ ദിവസം സൂചന നൽകുകയുണ്ടായി. ഭാവിയിൽ ചിലപ്പോൾ നീരാളി അല്ലെങ്കിൽ ഈനാംപേച്ചി പോലുള്ള ചിഹ്നങ്ങളിൽ തെരഞ്ഞെടുപ്പിനെ നേരിടാൻ പാർട്ടി നിർബന്ധിതരാകുമെന്ന് അദ്ദേഹം അനുഭാവികളോട് തമാശയായും പറഞ്ഞത് ദേശീയ തലത്തിൽ തന്നെ വാർത്തയായി.
വരാനിരിക്കുന്ന ലോക്‌സഭാ തെരഞ്ഞെടുപ്പിൽ നിശ്ചിത ശതമാനം വോട്ട് നേടാനും സീറ്റുകൾ നേടാനും സിപിഎം പരാജയപ്പെട്ടാൽ ദേശീയ പാർട്ടി പദവി നഷ്ടപ്പെടുമെന്നും തിരഞ്ഞെടുപ്പ് ചിഹ്നം പോലും നഷ്ടപ്പെടുമെന്നും ബാലൻ പറഞ്ഞു . ദേശീയ പാർട്ടി പദവി നഷ്‌ടപ്പെടുന്നതിൻ്റെ പ്രശ്‌നം സി.പി.എമ്മിന് സ്വന്തം ചിഹ്നം ഉപയോഗിക്കാൻ കഴിയാതാവും എന്നതാണ്. ചിഹ്നം അനുവദിക്കുന്നത് തിരഞ്ഞെടുപ്പ് കമ്മിഷൻ്റെ കാരുണ്യത്തിവുന്ന അവസ്ഥയിലാവും നമ്മൾ.”– ബാലൻ പറഞ്ഞതായി പത്രങ്ങൾ റിപ്പോർട്ട് ചെയ്തു . കേരള സ്റ്റേറ്റ് ഫിനാൻഷ്യൽ എൻ്റർപ്രൈസസ് ഓഫീസേഴ്സ് യൂണിയൻ (കെഎസ്എഫ്ഇഒയു) നേതൃത്വ ശിൽപശാല കോഴിക്കോട്ട് ഉദ്ഘാടനം ചെയ്ത് സംസാരിക്കുകയായിരുന്നു മുൻ കെഎസ്എഫ്ഇ ചെയർമാൻ കൂടിയായ എ കെ ബാലൻ.
സി.പി.എമ്മിന് അതിന്റെ ചിഹ്നം നഷ്ടപ്പെടാന്‍ പോകുന്നു എന്ന ആകുലത സിപിഎം നേതാവ് തന്നെ തുറന്നു പറഞ്ഞത് ആ പാര്‍ടിയുടെ ആസന്നമായ പരാജയ ഭീതിയാണ് പ്രകടമാക്കിയിരിക്കുന്നതെന്ന രീതിയിലേക്കാണ് ദേശീയ തലത്തില്‍ ആ ചര്‍ച്ച നീങ്ങിയത്. സത്യത്തില്‍ തലമുതിര്‍ന്ന നേതാവായ ബാലന്‍ അനവസരത്തിലായിരുന്നു ഇത്തരം ഒരു അഭിപ്രായപ്രകടനം നടത്തിയത്. തിരഞ്ഞെടുപ്പില്‍ സിപിഎം സ്ഥാനാര്‍ഥികളെ വിജയിപ്പിക്കുക പ്രധാനമാണ് എന്ന് പറയാനായി ബാലന്‍ ഉദ്ദേശിച്ച ഉപമ വായില്‍ നിന്നും വീണപ്പോള്‍ വന്നുഭവിച്ചത് അതിന്റെ വിപരീതാര്‍ഥത്തിലായിരുന്നു എന്നതാണ് പിന്നീട് നടന്ന ചര്‍ച്ചകളില്‍ തെളിഞ്ഞത്.
എന്തായാലും ബാലന്റെ പ്രസ്താവനയോടെ വീണ്ടും ഒരു കാര്യം കൂടുതല്‍ ചര്‍ച്ച ചെയ്യപ്പെടുന്നു- തിരഞ്ഞെടുപ്പു കഴിഞ്ഞാല്‍ സി.പിഎമ്മിനും സിപിഐക്കും അതിന്റെ പ്രസിദ്ധമായ തിരഞ്ഞെടുപ്പു ചിഹ്നങ്ങള്‍ നഷ്ടമാകും വിധം ദേശീയ പാര്‍ടി പദവി നഷ്ടപ്പെടുമോ എന്നതാണത്. ഒപ്പം സിപിഎമ്മിന് ഇപ്പോള്‍ ദേശീയ തലത്തില്‍ എന്തുമാത്രം പാര്‍ലമെന്ററി സ്വാധീനം ഉണ്ടെന്ന കാര്യവും ദേശീയ മാധ്യമങ്ങള്‍ ചര്‍ച്ച ചെയ്തു.
ഒരു രാഷ്ട്രീയ പാർട്ടിക്ക് ദേശീയ പദവി നഷ്ടപ്പെടുന്നതെങ്ങനെ?
താഴെപ്പറയുന്ന ഏതെങ്കിലും വ്യവസ്ഥകൾ പാലിക്കുകയാണെങ്കിൽ മാത്രമേ ഒരു രാഷ്ട്രീയ പാർട്ടിയെ ദേശീയ പാർട്ടിയായി കണക്കാക്കൂ.
ലോക്‌സഭയിലേക്കോ ഒരു സംസ്ഥാന അസംബ്ലിയിലേക്കോ കഴിഞ്ഞ പൊതുതിരഞ്ഞെടുപ്പിൽ നാലോ അതിലധികമോ സംസ്ഥാനങ്ങളിൽ പാർട്ടിയുടെ സ്ഥാനാർത്ഥികൾ ഓരോ സംസ്ഥാനത്തും പോൾ ചെയ്ത മൊത്തം സാധുവായ വോട്ടിൻ്റെ 6 ശതമാനത്തിൽ കുറയാതെ നേടിയിരിക്കണം. പൊതുതിരഞ്ഞെടുപ്പിൽ ഏതെങ്കിലും സംസ്ഥാനങ്ങളിൽ നിന്ന് കുറഞ്ഞത് നാല് അംഗങ്ങളെയെങ്കിലും പാർട്ടി ജയിപ്പിച്ചിരിക്കണം.
കഴിഞ്ഞ ലോക്‌സഭയിലേക്കുള്ള പൊതു തിരഞ്ഞെടുപ്പിൽ, ലോക്‌സഭയിലെ മൊത്തം സീറ്റുകളുടെ 2 ശതമാനമെങ്കിലും പാർട്ടി നേടിയിരിക്കണം. ( ഭിന്ന സംഖ്യ പാതിയിൽ അധികം എങ്കിൽ ഒന്ന് ആയി കണക്കാക്കും) കൂടാതെ, പാർട്ടിയുടെ സ്ഥാനാർത്ഥികൾ ഏതെങ്കിലും മൂന്ന് സംസ്ഥാനങ്ങളിൽ നിന്ന് തിരഞ്ഞെടുക്കപ്പെട്ടവരായിരിക്കണം.
കുറഞ്ഞത് നാല് സംസ്ഥാനങ്ങളിൽ പാർട്ടി ഒരു സംസ്ഥാന പാർട്ടിയായി അംഗീകരിക്കപ്പെട്ടിരിക്കണം.
ലോക്സഭയിൽ ഇപ്പോൾ സിപിഎമ്മിൻ്റെ പ്രാതിനിധ്യം
സിപിഎമ്മിന് ലോക്സഭയിൽ മൂന്ന് അംഗങ്ങൾ മാത്രമാണുള്ളത് – തമിഴ്നാട്ടിൽ നിന്ന് രണ്ട്, കേരളത്തിൽ നിന്ന് ഒരാൾ. 2019 ലോക്‌സഭാ തിരഞ്ഞെടുപ്പിൽ പോൾ ചെയ്ത വോട്ടിൻ്റെ 1.77 ശതമാനം പാർട്ടി നേടി .
2019ലെ പൊതുതെരഞ്ഞെടുപ്പിൽ കേരളത്തിൽ മാത്രം സിപിഎമ്മിൻ്റെ വോട്ട് വിഹിതം 25.97 ആയിരുന്നപ്പോൾ തമിഴ്നാട്ടിൽ 2.38 ശതമാനമായിരുന്നു. പാർട്ടിയുടെ ഇത്തവണത്തെ ഏക പ്രതീക്ഷ കേരളമാണെന്നാണ് ഇത് സൂചിപ്പിക്കുന്നത്.
2009 മുതൽ ലോക്‌സഭാ തെരഞ്ഞെടുപ്പിൽ സിപിഎമ്മിൻ്റെ പ്രകടനം താഴേക്കാണ് . 2004ൽ 43 സീറ്റുകൾ നേടിയ പാർട്ടി പക്ഷെ 2009-ൽ ജയിച്ചത് 16 സീറ്റിൽ. 2014-ലെ ലോക്‌സഭാ തെരഞ്ഞെടുപ്പിൽ പാർട്ടിക്കു കിട്ടിയത് ഒൻപത് സീറ്റുകൾ മാത്രം. 3.28 ശതമാനം വോട്ട് നേടി . 2019ൽ മൂന്ന് സീറ്റുകൾ മാത്രമാണ് നേടിയത്. ഇങ്ങനെ തുടർച്ചയായി താഴോട്ട് നീങ്ങുന്ന ഗ്രാഫ് ആണ് ഇപ്പോൾ സിപിമ്മിന് ഉള്ളത്.
സംസ്ഥാന നിയമസഭകളിൽ സിപിഎം പ്രാതിനിധ്യം
നിലവിൽ കേരളത്തിൽ സി.പി.എം. 2021ലെ കേരള നിയമസഭാ തിരഞ്ഞെടുപ്പിൽ 140 നിയമസഭാ സീറ്റുകളിൽ 62ലും വിജയിച്ചു. കേവലഭൂരിപക്ഷത്തിലെത്താൻ ആവശ്യമായ എട്ട് സീറ്റ് മാത്രം കുറവ്. പാർട്ടിക്കാണ് ഏറ്റവും കൂടുതൽ വോട്ട് കിട്ടിയത്- 47 ശതമാനം.
2021ലെ പശ്ചിമ ബംഗാൾ തിരഞ്ഞെടുപ്പിൽ ഒരു സീറ്റ് പോലും നേടാനാകാതെ വന്നതോടെ പാർട്ടിക്ക് വലിയ തിരിച്ചടി നേരിട്ടു . എന്നാൽ 2016ലെ സംസ്ഥാന തിരഞ്ഞെടുപ്പിൽ 294 അംഗ നിയമസഭയിൽ 26 സീറ്റുകൾ സിപിഎം നേടിയിരുന്നു .
ബിഹാറിൽ നടന്ന “മഹാഗഡ്ബന്ധ”നിൽ സിപിഎമ്മും ഉണ്ടായിരുന്നു . ജനതാദൾ (യുണൈറ്റഡ്) (ജെഡിയു), രാഷ്ട്രീയ ജനതാദൾ (ആർജെഡി) എന്നിവരുടെ നേതൃത്വത്തിലുള്ള സഖ്യത്തിൽ രണ്ട് സിപിഎം എംഎൽഎമാരുണ്ടായിരുന്നു. എന്നാൽ നിതീഷ് കുമാർ ആർജെഡിയുമായുള്ള ബന്ധം അവസാനിപ്പിച്ച് ഈ വർഷം ജനുവരിയിൽ സംസ്ഥാനത്ത് പുതിയ സർക്കാർ രൂപീകരിച്ചതോടെ പാർട്ടി ഭരണ സഖ്യത്തിൽ അല്ലാതെയായി.
2021ലെ അസം തെരഞ്ഞെടുപ്പിൽ ഒരു സീറ്റും 2021ലെ തമിഴ്‌നാട് തിരഞ്ഞെടുപ്പിൽ രണ്ട് സീറ്റും ഇടതുപക്ഷം നേടി. തമിഴ്നാട്ടിൽ ഭരണകക്ഷിയായ ദ്രാവിഡ മുന്നേറ്റ കഴകത്തിൻ്റെ (ഡിഎംകെ) സഖ്യകക്ഷിയാണ് സിപിഎം .
ത്രിപുര 2023 ലെ നിയമസഭാ തെരഞ്ഞെടുപ്പിൽ സി.പി.എം 11 സീറ്റുകൾ നേടി ബി.ജെ.പിക്കും ടി.എം.പിക്കും പിന്നിൽ മൂന്നാമത്തെ ഏറ്റവുമധികം സീറ്റ് നേടിയ പാർട്ടിയായി. എന്നാൽ ഒരു ദശാബ്ദം മുൻപ് സിപിഎം ഇവിടെ ഭരണത്തിൽ ഇരുന്നിരുന്നു എന്നതാണ് വസ്തുത.
ചുരുക്കത്തില്‍ 2009-നു ശേഷം സിപിഎം ലോക്‌സഭയിലേക്കുള്ള തിരഞ്ഞെടുപ്പില്‍ അതിന്റെ സീറ്റും വോട്ടു വിഹിതവും തുടര്‍ച്ചയായി നഷ്ടപ്പെടുന്ന സ്ഥിതിയിലേക്ക് പോയിരിക്കുന്നു. സംസ്ഥാന നിയമസഭകളിലേക്കുള്ള തിരഞ്ഞെടുപ്പുകളില്‍ നേരത്തെ ഭരണവും മൃഗീയ ഭൂരിപക്ഷവും ഉണ്ടായിരുന്ന ബംഗാളിലും ത്രിപുരയിലും വോട്ടുകളും സീറ്റുകളും ഗണ്യമായി നഷ്ടപ്പെട്ടു. കേരളത്തില്‍ പക്ഷേ തുര്‍ച്ചയായി രണ്ടാംതവണയും സംസ്ഥാന ഭരണത്തിലേക്ക് തിരഞ്ഞെടുക്കപ്പെട്ട ആശ്വാസം പാര്‍ടിക്കുണ്ട്.
ഇത്തവണ അതിനാല്‍ സിപിഎമ്മിന് നിര്‍ണായകമാണ് കാര്യങ്ങള്‍. പശ്ചിമബംഗാളില്‍ കോണ്‍ഗ്രസുമായുള്ള തിരഞ്ഞെടുപ്പു സഖ്യത്തിലൂടെ തിരിച്ചുവരവിന് ശ്രമിക്കുകയാണ് സിപിഎം. അതിന് സാധിക്കുമെന്നാണ് അവിടുത്തെ സംസ്ഥാന സെക്രട്ടറി മുഹമ്മദ് സലിം പറയുന്നത്. കോണ്‍ഗ്രസിന് ഗണ്യമായ സ്വാധീനമുള്ള സ്വന്തം സീറ്റ് തന്നെ അവര്‍ ഇത്തവണ മുഹമ്മദ് സലീമിനായി സന്തോഷപൂര്‍വ്വ വിട്ടു നല്‍കിയിരിക്കുന്നു എന്ന പ്രത്യേകതയും ഉണ്ടെന്ന് റിപ്പോര്‍ട്ട് ചെയ്യപ്പെടുന്നു.
ത്രിപുരയില്‍ സാഹചര്യം മെച്ചപ്പെടുത്തുമെന്നാണ് സിപിഎം അവകാശപ്പെടുന്നത്. മറ്റൊരു പ്രതീക്ഷ ഇന്ത്യ സഖ്യത്തിന്റെ ഭാഗമായി മല്‍സരിക്കുന്ന മറ്റ് സംസ്ഥാനങ്ങളിലാണ്. ഇതില്‍ ബിഹാര്‍, രാജസ്ഥാന്‍, തമിഴ്‌നാട്, ആന്ധ്ര, തെലങ്കാന തുടങ്ങിയ സംസ്ഥാനങ്ങളില്‍ നേട്ടമുണ്ടാക്കാന്‍ സാധിക്കുമെന്ന് പാര്‍ടി കരുതുന്നു.
ദേശീയ പാര്‍ടി പദവി സംരക്ഷിക്കാനാവശ്യമായ വോട്ടു വിഹിതമാണ് പാര്‍ടിക്ക് ഏറ്റവും പ്രധാനം, ഒപ്പം നിശ്ചിത എണ്ണം മിനിമം സീറ്റുകളും. മറ്റ് നിബന്ധനകള്‍ പാര്‍ടിക്ക് പാലിക്കാന്‍ ബുദ്ധിമുട്ടുണ്ടാവുകയില്ല. കേരളത്തില്‍ നിന്നും പരമാവധി സീറ്റുകള്‍ നേടുക എന്നത് സിപിഎമ്മിന്റെ അഖിലേന്ത്യാതലത്തില്‍ തന്നെയുള്ള ലക്ഷ്യമായി മാറുന്നത് ഈ പശ്ചാത്തലത്തിലാണ്.
