ബിജെപി പക്ഷത്തേക്ക് ചാഞ്ഞ് എന്‍സിപി നേതാവ് അജിത് പവാര്‍ മഹാരാഷ്ട്രയില്‍ മുഖ്യമന്ത്രി സ്ഥാനം ലക്ഷ്യമിടുന്നു എന്ന അഭ്യൂഹങ്ങള്‍ക്കിടയില്‍ പുതിയൊരു ചലനം-കര്‍ണാടക നിയമസഭാ തിരഞ്ഞെടുപ്പിന്റെ പ്രചാരണത്തിനായുള്ള എന്‍സിപിയുടെ താരപ്രചാരകരുടെ പട്ടികയില്‍ അജിത്ത് പവാറിനെ ഉള്‍പ്പെടുത്തിയിട്ടില്ല. മാത്രമല്ല, മഹാരാഷ്ട്ര എന്‍സിപി നേതാക്കളായ ഛഗ്ഗന്‍ ഭുജബല്‍, സുനില്‍ തത്കരെ എന്നിവരും ഒഴിവാക്കപ്പെട്ടിരിക്കുന്നു.
എൻസിപി അധ്യക്ഷൻ ശരദ് പവാർ, ബാരാമതി എൽഎസ് എംപി സുപ്രിയ സുലെ, രാജ്യസഭാ എംപിമാരായ പ്രഫുൽ പട്ടേൽ, ഫൗസിയ ഖാൻ, മഹാരാഷ്ട്ര എൻസിപി ജനറൽ സെക്രട്ടറി ശിവാജിറാവു ഗാർജെ, പാർട്ടി വക്താവ് ക്ലൈഡ് ക്രാസ്റ്റോ എന്നിവർ പട്ടികയിലുണ്ട് . കർണാടകയിലെ ഒമ്പത് നിയമസഭാ സീറ്റുകളിൽ എൻസിപി മത്സരിക്കുന്നു. ദേശീയ പാർട്ടി പദവി നഷ്ടപ്പെട്ടതിന് ശേഷം പാർട്ടി നേരിടുന്ന ആദ്യ തെരഞ്ഞെടുപ്പാണിത്.
താരപ്രചാരകരുടെ പട്ടിക വെച്ച് നിഗമനങ്ങളില്‍ എത്തിച്ചേരരുതെന്ന് മുതിര്‍ന്ന നേതാക്കള്‍ മാധ്യമങ്ങളോട് പറയുന്നുണ്ടെങ്കിലും അഭ്യൂഹങ്ങള്‍ ശക്തമാണ്.
