രാജ്യത്തെ ആദ്യ ഇന്ത്യൻ ഗവർണർ ജനറലായ സി രാജഗോപാലാചാരിയുടെ കൊച്ചുമകനും മുൻ കോൺഗ്രസ് നേതാവുമായ സി ആർ കേശവൻ ശനിയാഴ്ച ഭാരതീയ ജനതാ പാർട്ടിയിൽ ചേർന്നു. രണ്ട് പതിറ്റാണ്ടിലേറെയായി കോണ്‍ഗ്രസിനു വേണ്ടി പ്രവര്‍ത്തിക്കുന്ന തനിക്ക് ആ പാര്‍ടിയുടെ മൂല്യങ്ങളൊന്നും ഇപ്പോള്‍ അവശേഷിക്കുന്നത് കാണാനാവുന്നില്ല എന്ന് പറഞ്ഞു കൊണ്ട് കേശവന്‍ ഇക്കഴിഞ്ഞ ഫെബ്രുവരിയില്‍ കോണ്‍ഗ്രസില്‍ നിന്നും രാജിവെച്ചിരുന്നു.
കേരളത്തില്‍ അനില്‍ ആന്റണിക്കും ആന്ധ്രയില്‍ കിരണ്‍കുമാര്‍ റെഡ്ഡിക്കും പിറകെ തമിഴ്‌നാട്ടിലെ ഒരു കോണ്‍ഗ്രസ് നേതാവും ബി.ജെ.പിയിലേക്ക് പോയതോടെ തെക്കെ ഇന്ത്യയിലെ പ്രധാന മൂന്ന് സംസ്ഥാനത്തും ബിജെപിയിലേക്ക് കോണ്‍ഗ്രസ് നേതാക്കള്‍ കൂടുമാറുന്ന പ്രവണത തുടരുന്നു എന്ന് വിലയിരുത്തപ്പെടുന്നു.
“ലോകത്തിലെ ഏറ്റവും വലിയ രാഷ്ട്രീയ പാർട്ടിയിൽ എന്നെ ഉൾപ്പെടുത്തിയതിന് മുതിർന്നവരോട് നന്ദി പറയാൻ ഞാൻ ആഗ്രഹിക്കുന്നു, പ്രത്യേകിച്ച് പ്രധാനമന്ത്രി തമിഴ്‌നാട്ടിൽ ഉള്ള ഒരു ദിവസം,” കേശവൻ ന്യൂഡൽഹിയിൽ ഒരു പത്രസമ്മേളനത്തിൽ പറഞ്ഞു. “സി രാജഗോപാലാചാരി ഉൾപ്പെടെയുള്ള നമ്മുടെ മഹത്തായ രാഷ്ട്രത്തിന്റെ സ്ഥാപക പിതാക്കന്മാരോടും അമ്മമാരോടും ബിജെപിക്കുള്ള ആഴമായ ബഹുമാനം തെളിയിക്കുന്നതാണ് അവരുടെ സാന്നിദ്ധ്യം.”–കേശവൻ പറഞ്ഞു.
