ഇന്ത്യയോടുള്ള ലോകത്തിന്റെ കാഴ്ചപ്പാട് മാറിയെന്നും ഓരോ ഇന്ത്യക്കാരന്റെയും ആത്മവിശ്വാസമാണ് ഇന്നുണ്ടായ ഏറ്റവും വലിയ മാറ്റമെന്നും പ്രസിഡന്റ് ദ്രൗപതി മുർമു അഭിപ്രായപ്പെട്ടു. പാര്ലമെന്റിന്റെ ബജറ്റ് സമ്മേളനം ആരംഭിച്ചപ്പോൾ പാർലമെന്റിന്റെ സംയുക്ത സമ്മേളനത്തെ അഭിസംബോധന ചെയ്ത രാഷ്ട്രപതി, അടുത്ത 25 വർഷത്തിനുള്ളിൽ ആധുനികതയുടെ എല്ലാ സുവർണ അധ്യായങ്ങളും ഉൾക്കൊള്ളുന്ന ഒരു വികസിത ഇന്ത്യ കെട്ടിപ്പടുക്കാൻ ജനങ്ങളോട് അഭ്യർത്ഥിച്ചു.
ഇന്ത്യയുടെ സ്വാതന്ത്ര്യത്തിന്റെ നൂറാം വാർഷികത്തിൽ അവസാനിക്കുന്ന 25 വർഷത്തെ ‘അമൃത് ‘ കാലഘട്ടമെന്ന് സർക്കാർ വിശേഷിപ്പിക്കുന്നു. ‘ആത്മനിർഭർ’ ഇന്ത്യയെ കെട്ടിപ്പടുക്കാനുള്ള സമയമാണെന്നും ദ്രൗപതി മുർമു പറഞ്ഞു.
“സർജിക്കൽ സ്‌ട്രൈക്കുകൾ മുതൽ ഭീകരതയ്‌ക്കെതിരായ കഠിനമായ അടിച്ചമർത്തൽ വരെ, നിയന്ത്രണ രേഖ മുതൽ എൽ‌എസി വരെ, ആർട്ടിക്കിൾ 370 റദ്ദാക്കൽ മുതൽ മുത്തലാഖ് വരെ, എന്റെ സർക്കാർ ഒരു നിർണായക സർക്കാരായി അംഗീകരിക്കപ്പെട്ടു”– പ്രസിഡന്റ് മുർമു പറഞ്ഞു.
പ്രധാനമന്ത്രി നരേന്ദ്രമോദിയുടെ നേതൃത്വത്തിലുള്ള സർക്കാരിന്റെ ഒമ്പത് വർഷത്തെ ഭരണത്തിന് കീഴിൽ, രാജ്യം നിരവധി നല്ല മാറ്റങ്ങൾ കണ്ടു. ഓരോ ഇന്ത്യക്കാരന്റെയും ആത്മവിശ്വാസം അതിന്റെ ഉച്ചസ്ഥായിയിലാണെന്നും ലോകം ഇന്ത്യയെ നോക്കുന്ന രീതി മാറിയെന്നും രാഷ്ട്രപതി പറഞ്ഞു.
ഇന്ത്യ അതിന്റെ പ്രശ്‌നങ്ങൾ പരിഹരിക്കാൻ നേരത്തെ മറ്റുള്ളവരെ ആശ്രയിച്ചിരുന്നെങ്കിൽ ഇപ്പോൾ നമ്മൾ ആഗോള പ്രശ്‌നങ്ങൾ പരിഹരിക്കാൻ പ്രവർത്തിക്കുകയാണെന്ന് മുർമു അവകാശപ്പെട്ടു.
മോദി സർക്കാരിന്റെ കാലത്ത് ഡിജിറ്റൽ ശൃംഖലയുടെ വിപുലീകരണവും അഴിമതിക്കെതിരായ നടപടികളും തുടങ്ങിയതായി രാഷ്ട്രപതി പറഞ്ഞു . “ഇന്ത്യയിൽ ഇപ്പോൾ സുസ്ഥിരവും നിർഭയവും നിർണ്ണായകവും വലിയ സ്വപ്‌നങ്ങൾ സാക്ഷാത്കരിക്കാൻ പ്രവർത്തിക്കുന്നതുമായ ഒരു സർക്കാരാണ് ഉള്ളത്. സത്യസന്ധതയെ മാനിക്കുവാനും പാവപ്പെട്ടവരുടെ പ്രശ്‌നങ്ങൾ പരിഹരിക്കാനും അവരെ ശാശ്വതമായി ശാക്തീകരിക്കാനും പ്രവർത്തിക്കുന്ന ഒരു സർക്കാരാണ് ഇന്ത്യയിലുള്ളത്”
സ്ത്രീകൾക്കായുള്ള ഗവൺമെന്റിന്റെ വിവിധ പദ്ധതികളെ രാഷ്ട്രപതി പ്രകീർത്തിച്ചു. “‘ബേട്ടി ബച്ചാവോ, ബേട്ടി പഠാവോ’ കാമ്പെയ്‌നിന്റെ വിജയം ഞങ്ങൾ കാണുന്നു; ഇന്ത്യയിൽ ആദ്യമായി സ്ത്രീകളുടെ എണ്ണം പുരുഷന്മാരേക്കാൾ കൂടുതലാണ്– രാഷ്ട്രപതി പറഞ്ഞു.
