ആദ്യ അഞ്ച് റൗണ്ട് വോട്ടെടുപ്പിൽ തന്നെ ബിജെപി 310 സീറ്റുകൾ കടന്നെന്നും കോൺഗ്രസിന് 40 സീറ്റുകൾ പോലും കിട്ടില്ലെന്നും കേന്ദ്ര ആഭ്യന്തര മന്ത്രി അമിത് ഷാ വ്യാഴാഴ്ച പ്രഖ്യാപിച്ചു.
“ആദ്യ അഞ്ച് ഘട്ടങ്ങളിൽ ഇന്ത്യ സഖ്യം തുടച്ചുനീക്കപ്പെട്ടു. ഇത്തവണ കോൺഗ്രസിന് 40 സീറ്റുകൾ പോലും ലഭിച്ചില്ല . അഖിലേഷ് യാദവിന് നാല് സീറ്റുകൾ പോലും ലഭിക്കില്ല .”– ഉത്തര്‍പ്രദേശില്‍ സിദ്ധാർത്ഥ് നഗറിൽ ബിജെപി സ്ഥാനാർത്ഥി ജഗദാംബിക പാലിന്റെ തിരഞ്ഞെടുപ്പ് യോഗത്തിൽ ഷാ പറഞ്ഞു.
ബിജെപി അധികാരത്തില്‍ എത്തിയാല്‍ പാക് അധീന കാശ്മീര്‍ ഇന്ത്യ പിടിച്ചെടുക്കും എന്ന് അമിത് ഷാ അവകാശപ്പെട്ടു. പാക് അധീന കാശ്മീര്‍ ഇപ്പോള്‍ പാകിസ്ഥാന്‍ നിയന്ത്രിക്കുന്ന പ്രദേശമാണ്. അത് പിടിച്ചെടുക്കല്‍ ഇന്ത്യ-പാക് യുദ്ധത്തിലേക്ക് തന്നെ നയിക്കുമെന്ന് ഉറപ്പുള്ള സാഹചര്യത്തില്‍ ഹിന്ദുത്വ വികാരത്തിന്റെ ആളിക്കത്തിക്കല്‍ ആണ് ബിജെപി ഇതിലൂടെ ഉദ്ദേശിക്കുന്നത് എന്നത് വ്യക്തമാണ്.
“പാകിസ്ഥാൻ നേതാക്കൾ പറയുന്നത് പാക് അധീന കാശ്മീര്‍ തങ്ങളുടേതാണെന്നാണ് . കോൺഗ്രസ് നേതാക്കളും തങ്ങൾക്ക് ആറ്റം ബോംബ് ഉണ്ടെന്ന് പറയുന്നുണ്ട്. ബിജെപിക്കാർക്ക് ആറ്റംബോംബിനെ പേടിയില്ല. പാക് അധീന കാശ്മീര്‍ ഇന്ത്യയുടെ ഭാഗമായി തുടരും, ഞങ്ങൾ അത് തിരിച്ചെടുക്കും.”- അദ്ദേഹം പറഞ്ഞു.
എസ്‌സി/എസ്‌ടി, ഒബിസി സംവരണം അവസാനിപ്പിക്കാനാണ് പ്രതിപക്ഷം ശ്രമിക്കുന്നതെന്ന് ഷാ പറഞ്ഞു.
“രാഹുൽ ബാബയും അഖിലേഷ് യാദവും വോട്ട് ബാങ്ക് രാഷ്ട്രീയത്താൽ നിങ്ങളെ അന്ധരാക്കിയിരിക്കുന്നു. ഞങ്ങൾ മതത്തിൻ്റെ അടിസ്ഥാനത്തിലുള്ള സംവരണം പൂർത്തിയാക്കി തിരികെ നൽകും.”– അദ്ദേഹം പറഞ്ഞു.
ഇന്ത്യാ ബ്ലോക്കിന് പ്രധാനമന്ത്രി ഇല്ലെന്നും സഖ്യത്തിന് അധികാരത്തിലെത്തിയാൽ അഞ്ച് പ്രധാനമന്ത്രിമാരുണ്ടാകുമെന്നും ഷാ പരിഹസിച്ചു. ലോക്‌സഭാ തെരഞ്ഞെടുപ്പിൻ്റെ ഫലം വന്നതിന് പിന്നാലെ രാഹുൽ ഗാന്ധിയും അഖിലേഷ് യാദവും വിദേശത്തേക്ക് പോകാൻ ടിക്കറ്റ് ബുക്ക് ചെയ്തതായി അമിത് ഷാ കളിയാക്കി.
