2024ലെ ലോക്‌സഭാ തിരഞ്ഞെടുപ്പിൽ ബിജെപി ഒറ്റയ്ക്ക് 370 സീറ്റുകൾ നേടാനുള്ള സാധ്യത വളരെ കുറവാണെന്ന് രാഷ്ട്രീയ തന്ത്രജ്ഞൻ പ്രശാന്ത് കിഷോർ പറഞ്ഞു. ടൈംസ് നൗവിന് നൽകിയ അഭിമുഖത്തിൽ, ബിജെപിക്ക് ഒറ്റയ്ക്ക് 370 ലോക്‌സഭാ സീറ്റുകൾ ലഭിച്ചാൽ താൻ അത്ഭുതപ്പെടുമെന്ന് പ്രശാന്ത് കിഷോർ പറഞ്ഞു. “പ്രധാനമന്ത്രി നരേന്ദ്ര മോദി പാർലമെൻ്റിൽ ഈ സംഖ്യയെക്കുറിച്ച് സംസാരിച്ചു. എന്നാൽ ഇത് ബിജെപി പ്രവർത്തകരുടെ ലക്ഷ്യം മാത്രമാണെന്ന് ഞാൻ കരുതുന്നു, സാധ്യതയല്ല.”– പ്രശാന്ത് കിഷോർ പറഞ്ഞു.
തൻ്റെ രണ്ടാം ടേമിൽ സർക്കാർ റദ്ദാക്കിയ ആർട്ടിക്കിൾ 370 ൻ്റെ ചുവടു പിടിച്ചാണ് ആദ്യമായി പാർലമെൻ്റിൽ 370 എന്ന കണക്ക് നരേന്ദ്ര മോദി പരാമർശിച്ചത്. ബിജെപി ഒറ്റയ്ക്ക് 370 സീറ്റുകൾ നേടുമെന്നും എൻഡിഎ 400 കടക്കുമെന്നും അദ്ദേഹം പറഞ്ഞു. പിന്നീട് പ്രസംഗിച്ച പല റാലികളിലും ലക്ഷ്യം 370 സീറ്റുകൾ ആണെന്ന് മോദി ആവർത്തിച്ചു.
ബംഗാളിലും തമിഴ്‌നാട്ടിലും ബിജെപി ഉയരും
“ബംഗാളിൽ ബി.ജെ.പി മികച്ച പ്രകടനം കാഴ്ചവെക്കാൻ സാധ്യതയുണ്ട്. തമിഴ്‌നാട്ടിൽ ബി.ജെ.പി ആദ്യമായി ഇരട്ട അക്കത്തിലേക്ക് എത്തിയേക്കും. തെലങ്കാനയിലും ബി.ജെ.പി മികച്ച പ്രകടനം കാഴ്ചവെക്കുമെന്ന് പ്രശാന്ത് കിഷോർ പറഞ്ഞു. സന്ദേശ്ഖാലി പോലുള്ള പ്രശ്‌നങ്ങൾ ബംഗാളിൽ തൃണമൂലിനെ തളർത്തും. എന്നാൽ സന്ദേശ്ഖാലി ഉണ്ടായാലും ഇല്ലെങ്കിലും ബംഗാളിൽ ബിജെപി ഉയരുകയാണ്. ബംഗാളിൽ ബിജെപി തീർന്നുവെന്ന് കരുതുന്ന ഡൽഹിയിലെ പലരെയും 2024ലെ ബംഗാളിലെ തിരഞ്ഞെടുപ്പ് ഫലം അത്ഭുതപ്പെടുത്തും. “– പ്രശാന്ത് കിഷോർ പറഞ്ഞു.
ബിജെപി വിജയിക്കുകയാണെങ്കിൽ സ്വേച്ഛാധിപത്യ സാധ്യത
2024ലെ തെരഞ്ഞെടുപ്പിൽ ബിജെപി വിജയിക്കുകയാണെങ്കിൽ സ്വേച്ഛാധിപത്യ ഭരണത്തിൻ്റെ അടയാളങ്ങൾ കൂടുതൽ പ്രകടമാകും. എന്നാൽ ഇത് ബിജെപി മാത്രം ചെയ്യുന്നതല്ല. ഏതെങ്കിലും വ്യക്തിയോ ഗ്രൂപ്പോ വളരെ ശക്തരാകുമ്പോഴെല്ലാം സമൂഹത്തിൻ്റെ ജനാധിപത്യ ഘടന വിട്ടുവീഴ്ച ചെയ്യപ്പെടുന്നു, ഇന്ദിരാഗാന്ധിയുടെ ഉദാഹരണം. എന്നാൽ പ്രതിപക്ഷം ഭരിക്കുന്ന 15 സംസ്ഥാനങ്ങളുണ്ടെന്ന കാര്യം ശ്രദ്ധിക്കണം.”– പ്രശാന്ത് പറഞ്ഞു. ഇന്ത്യാ മുന്നണി വൈകിയാണ് ആരംഭിച്ചതെന്നും അവർ ഇപ്പോൾ ചെയ്യുന്നത് കഴിഞ്ഞ വർഷം ചെയ്യണമായിരുന്നുവെന്നും പ്രശാന്ത് കിഷോർ പറഞ്ഞു.
