അൽഖ്വയ്ദയുടെ സ്ഥാപകൻ ഒസാമ ബിൻ ലാദനെ ലോകത്തിലെ ഏറ്റവും മികച്ച ജൂനിയർ എഞ്ചിനീയർ എന്ന് വിശേഷിപ്പിച്ച് അദ്ദേഹത്തിന്റെ ചിത്രം പതിപ്പിച്ചതിന് ഉത്തർപ്രദേശിലെ സർക്കാർ ഉദ്യോഗസ്ഥനെ ബുധനാഴ്ച സസ്പെൻഡ് ചെയ്തതായി വാർത്താ ഏജൻസിയായ പിടിഐ റിപ്പോർട്ട് ചെയ്തു. ദക്ഷിണാഞ്ചൽ വിദ്യുത് വിത്രൻ നിഗം ലിമിറ്റഡിന്റെ സബ് ഡിവിഷണൽ ഓഫീസർ രവീന്ദ്ര പ്രകാശ് ഗൗതം ആണ് തന്റെ ഓഫീസിൽ ബിൻ ലാദന്റെ ചിത്രം പതിച്ചത്. കുറിപ്പിനൊപ്പം ബിൻ ലാദന്റെ ചിത്രം സോഷ്യൽ മീഡിയയിൽ വ്യാപകമായി ഷെയർ ചെയ്യപ്പെട്ടതിനെ തുടർന്ന് മുതിർന്ന ഉദ്യോഗസ്ഥർ ഇടപെട്ടു ഗൗതമിനെ സസ്പെൻഡ് ചെയ്യാൻ ഉത്തരവിടുകയും ചെയ്തു. പിന്നീട് എസ്ഡിഒ ഓഫീസിൽ നിന്ന് ചിത്രം നീക്കം ചെയ്തു. ഗൗതമിനെ സസ്പെൻഡ് ചെയ്തതായി ഫറൂഖാബാദ് ജില്ലാ മജിസ്‌ട്രേറ്റ് സഞ്ജയ് കുമാർ സിംഗ് പിടിഐയോട് പറഞ്ഞു.
എന്നാൽ രവീന്ദ്ര പ്രകാശ് ഗൗതം തന്റെ പ്രവൃത്തിയെ ന്യായീകരിച്ചു, ഏതൊരു വ്യക്തിക്കും ആരുടെയെങ്കിലും “വിഗ്രഹം” ആകാമെന്ന് അദ്ദേഹം പറഞ്ഞു. “ലോകത്തിലെ ഏറ്റവും മികച്ച ജൂനിയർ എഞ്ചിനീയറായിരുന്നു ഒസാമ. ചിത്രം നീക്കം ചെയ്‌തെങ്കിലും അതിന്റെ നിരവധി പകർപ്പുകൾ എന്റെ പക്കലുണ്ട്,” ഗൗതം പറഞ്ഞതായി പിടിഐ റിപ്പോർട്ട് ചെയ്തു.
