കഴിഞ്ഞ ദിവസം മൈസൂരിനടുത്ത രാമനഗരയിലെ സാത്തനൂരില്‍ ന്യൂനപക്ഷ വിഭാഗത്തില്‍ പെട്ട ഒരാളെ പശുക്കടത്ത് ആരോപിച്ച് തല്ലിക്കൊന്ന കേസില്‍ പ്രതിസ്ഥാനത്തുള്ള പശുസംരക്ഷണസേന നേതാവ് പുനീത് കേരെഹള്ളി കര്‍ണാടകത്തിലെയും ഡെല്‍ഹിയിലെയും പ്രമുഖ തീവ്രഹിന്ദുത്വം പറഞ്ഞ് വിദ്വേഷം ജ്വലിപ്പിക്കുന്ന ബിജെപി നേതാക്കളുടെ ഉറ്റ സുഹൃത്താണെന്ന് തെളിയുന്നു. തിങ്കളാഴ്ച രാത്രി ഇദ്രിസ് പാഷ എന്ന യുവാവാണ് കൊല്ലപ്പെട്ടത്.
കര്‍ണാടകയിലെ ഏറ്റവും മതവിദ്വേഷം വമിക്കുന്ന ഹിന്ദുത്വ പ്രവര്‍ത്തകരില്‍ പലരുമായും പുനീത് അടുത്ത ബന്ധം പുലര്‍ത്തുന്നതിന് തെളിവായി അവരോടൊപ്പമുള്ള ഫോട്ടോകള്‍ ഒരു ദേശീയ മാധ്യമം പുറത്തു വിട്ടു. ശ്രീരാമസേനയുടെ നേതാവ് പ്രമോദ് മുത്താലിക്, ബിജെപി എം.പി. തേജസ്വി സൂര്യ, ഡെല്‍ഹിയിലെ 2020-ലെ കലാപത്തിന് ആധാരമായ വിദ്വേഷ പ്രസംഗം നടത്തിയെന്ന് ആരോപിക്കപ്പെട്ട കപില്‍ മിശ്ര, ബിജെപി എം.പി. പ്രതാപ് സിംഹ, തമിഴനാട് പാര്‍ടി അധ്യക്ഷന്‍ കെ.അണ്ണാമലൈ, ബിജെപിയുടെ പല സംസ്ഥാന മന്ത്രിമാര്‍ തുടങ്ങി പല ബിജെപി-സംഘപരിവാര്‍ നേതാക്കളുമായും പുനീതിന് അടുത്ത ബന്ധമാണുള്ളത്. ആര്‍എസ്എസുമായും ഇയാള്‍ക്ക് ബന്ധമുണ്ടെന്ന് ചിലര്‍ പറയുന്നതായി മാധ്യമവാര്‍ത്തയിലുണ്ട്.
ഡെല്‍ഹിയിലെ ബിജെപി നേതാവ് കപില്‍ മിശ്രയ്‌ക്കൊപ്പം
പുനീത് കേരേഹള്ളിയെയും അക്രമി സംഘത്തെയും ഇനിയും പൊലീസ് അറസ്റ്റ് ചെയ്തിട്ടില്ല. ഐപിസി 302 -കൊലപാതകം തുടങ്ങിയ വകുപ്പുകൾ പ്രകാരമാണ് ഇവർക്കെതിരെ പൊലീസ് കേസെടുത്തിരിക്കുന്നത്.
മുൻ മുഖ്യമന്ത്രിയും കോൺഗ്രസ് നേതാവുമായ സിദ്ധരാമയ്യ ഇദ്രീസിന്റെ കൊലപാതകം “തെരഞ്ഞെടുപ്പിന് മുന്നോടിയായി വർഗീയ ജ്വാലകൾ ആളിക്കത്തിക്കാനും വോട്ടർമാരെ ധ്രുവീകരിക്കാനുമുള്ള ആസൂത്രിത നടപടി” എന്ന് വിശേഷിപ്പിച്ചുകൊണ്ട് ആഭ്യന്തര മന്ത്രി ജ്ഞാനേന്ദ്ര അരാഗയെ “നേരിട്ട് ഉത്തരവാദി” എന്ന് ട്വീറ്റ് ചെയ്തു.
2021 സെപ്റ്റംബറിൽ, കേരേഹള്ളിയുടെ നേതൃത്വത്തിലുള്ള ഒരു സംഘം മതപരിവർത്തനം ആരോപിച്ച് ക്രിസ്ത്യൻ പ്രാർത്ഥനാ യോഗം തടസ്സപ്പെടുത്തിയതായിപരാതി ഉയർന്നു . ഒടുവിൽ, കോവിഡ് -19 നിയന്ത്രണങ്ങൾ ചൂണ്ടിക്കാട്ടി മുനിസിപ്പൽ കോർപ്പറേഷൻ പ്രാർത്ഥനാ യോഗങ്ങൾ നിർത്തിവയ്ക്കാൻ നോട്ടീസ് നൽകി . കേരേഹള്ളിയുടെ പ്രചാരണങ്ങൾ സംഘത്തിന്റെ ഹിന്ദുത്വ അജണ്ടയുമായി ഒത്തുപോകുന്നതിനാൽ, ഇത് അദ്ദേഹത്തിന് ഹിന്ദുത്വ അനുകൂല നേതാക്കളിലേക്ക് പ്രവേശനം ഉറപ്പാക്കിയിരുന്നു.
2022 ഏപ്രിലിൽ കേരേഹള്ളി ബെംഗളൂരുവിൽ ഹലാൽ മാംസം ബഹിഷ്കരിക്കണമെന്ന് ആവശ്യപ്പെട്ട് ഒരു കാമ്പയിൻ ആരംഭിച്ചു. ദേശീയ പതാക പതിച്ച ടിപ്പു സുൽത്താന്റെ ചിത്രം നശിപ്പിച്ചെന്നാരോപിച്ച് കഴിഞ്ഞ വർഷം ഓഗസ്റ്റിൽ ബെംഗളൂരുവിലെ ഹലസുർഗേറ്റ് പോലീസ് പുനീതിനെതിരെ ദേശീയ ബഹുമതികളെ അപമാനിക്കുന്നത് തടയൽ നിയമം1971, മതവികാരം വ്രണപ്പെടുത്തൽ എന്നിവ പ്രകാരം കേസെടുത്തു. അറസ്റ്റിലായി ജാമ്യത്തിൽ പുറത്തിറങ്ങിയ പുനീത് പഴയ പണി നിർത്തിയില്ല. കഴിഞ്ഞ വർഷം നവംബറിൽ വിശ്വേശ്വരപുരത്ത് നടക്കുന്ന മതപരമായ ഉത്സവത്തിൽ മുസ്ലീം വ്യാപാരികളെ പങ്കെടുപ്പിക്കുന്നതിന് അധികാരികൾക്കെതിരെ പ്രതിഷേധിക്കുമെന്ന് ഭീഷണിപ്പെടുത്തിയതിനെ തുടർന്ന് കേരേഹള്ളിയെയും കൂട്ടരെയും കസ്റ്റഡിയിലെടുത്തിരുന്നു. വിഷയത്തിൽ പ്രാദേശിക ബിജെപി എംഎൽഎ ഉദയ് ഗരുഡാചാ റുമായിട്ടാണ് കേരേഹള്ളി രംഗത്തെത്തിയത് .
കഴിഞ്ഞ വർഷം ഡിസംബറിൽ കേരേഹള്ളി രാഷ്ട്ര രക്ഷണ പദെ എന്ന പേരിൽ ഒരു ഫോറവും അധ്വ എന്ന യൂട്യൂബ് ചാനലും ആരംഭിച്ചു. കന്നുകാലി വ്യാപാരികളെ തടയുന്നതിന്റെ വീഡിയോകൾ അദ്ദേഹം ഇവിടെ പ്രത്യേകം പോസ്റ്റ് ചെയ്തിരുന്നു . കന്നുകാലി കച്ചവടക്കാരിൽ നിന്ന് പണം തട്ടിയതായി അന്നുമുതൽ കേരേഹള്ളിക്കെതിരെ ആരോപണവും ഉയർന്നിരുന്നു.
