നേപ്പാളും സാമ്പത്തിക പ്രശ്നങ്ങളിലേക്ക് കൂപ്പുകുത്തുന്നതായി സംശയം . കാർ, സ്വർണം, സൗന്ദര്യവർധക വസ്തുക്കൾ എന്നിവയുടെ ഇറക്കുമതിക്ക് നേപ്പാൾ കർശന നിയന്ത്രണം ഏർപ്പെടുത്തി.
സാമ്പത്തിക പ്രതിസന്ധി കൂടുതൽ രൂക്ഷമാകുന്നതിനു മുമ്പുള്ള കടുത്ത നടപടികൾ സ്വീകരിക്കുകയാണ് നേപ്പാൾ ഇപ്പോൾ.
ശ്രീലങ്കയുടെ അതേ അവസ്ഥയിലേക്ക് എത്തിയേക്കാമെന്ന വിദഗ്ധരുടെ മുന്നറിയിപ്പിനെ തുടര്‍ന്നാണ് നേപ്പാളും കരുതലെടുത്തിരിക്കുന്നത്. ശ്രീലങ്കയെ പോലെ വിനോദ സഞ്ചാരമാണ് നേപ്പാളിലെയും പ്രധാന വിദേശ നാണ്യ വരുമാന മാര്‍ഗം. കൊവിഡ് ഈ രാജ്യത്തെ വരുമാനത്തെയും കാര്യമായി ബാധിച്ചിരുന്നു.
വർദ്ധിച്ചുവരുന്ന ഇറക്കുമതി കാരണം സമ്പദ്‌വ്യവസ്ഥയിൽ ഏതെങ്കിലും തരത്തിലുള്ള പ്രതിസന്ധിയുണ്ടാകാൻ സാധ്യതയുണ്ടെന്ന് നേപ്പാൾ രാഷ്ട്ര ബാങ്ക് വക്താവ് ഗുണഖർ ഭട്ട പറഞ്ഞു. ടൂറിസത്തിൽ നിന്നുള്ള വരുമാനം കുറഞ്ഞു, രാജ്യത്ത് 6 മാസത്തെ വിദേശനാണ്യ ശേഖരം മാത്രമേയുള്ളൂ. 2021 ജൂലൈ മുതൽ, ടൂറിസത്തിൽ നിന്നും കയറ്റുമതിയിൽ നിന്നുമുള്ള കുറഞ്ഞ വരുമാനം കാരണം നേപ്പാൾ വിദേശനാണ്യ കരുതൽ ശേഖരത്തിൽ ഇടിവ് രേഖപ്പെടുത്തി. സെൻട്രൽ ബാങ്ക് ഡാറ്റ പ്രകാരം നേപ്പാളിന്റെ വിദേശനാണ്യ കരുതൽ ശേഖരം 2021 ജൂലൈ പകുതിയോടെ 11.75 ബില്യൺ ഡോളറിൽ നിന്ന് 2022 ഫെബ്രുവരി വരെ 17% കുറഞ്ഞ് 9.75 ബില്യൺ യുഎസ് ഡോളറായി.
