ഇന്ത്യയുടെ എക്കാലത്തെയും മികച്ച ശബ്ദം ലതാ മങ്കേഷ്കര് (92) അന്തരിച്ചു. മുംബൈ ബ്രീച്ച് കാന്ഡി ആശുപത്രിയിലായിരുന്നു അന്ത്യം. ശിവസേനയുടെ മുതിർന്ന നേതാവ് സഞ്ജയ് റാവത്താണ് ഇവരുടെ മരണവാർത്ത ഇന്ന് രാവിലെ ട്വിറ്ററിലൂടെ പങ്കുവെച്ചത്. ഇന്നലെ മുതൽ മുംബൈയിലെ ബ്രീച്ച് കാൻഡി ഹോസ്പിറ്റലിൽ വെന്റിലേറ്ററിലായിരുന്നു ലത. ഒടുവിൽ ഇന്ന് രാവിലെ കൊവിഡ് സംബന്ധമായ സങ്കീർണതകളെ തുടർന്ന് മരണത്തിന് കീഴടങ്ങി. കോവിഡ് പിടിപെട്ടതിനെത്തുടര്ന്ന് ജനുവരി എട്ടിനാണ് അവരെ ആശുപത്രിയില് പ്രവേശിപ്പിച്ചത്.
ലതാ മങ്കേഷ്കറിന് 1989-ൽ ഇന്ത്യാ ഗവൺമെന്റ് ദാദാസാഹിബ് ഫാൽക്കെ അവാർഡ് നൽകി ആദരിച്ചു. 2001-ൽ, രാഷ്ട്രത്തിനുള്ള അവരുടെ സംഭാവനകളെ മാനിച്ച് പരമോന്നത സിവിലിയൻ ബഹുമതിയായ ഭാരതരത്ന നൽകി രാജ്യം അവരെ ആദരിച്ചു. 2007-ൽ ഫ്രാൻസ് അവരുടെ പരമോന്നത സിവിലിയൻ ബഹുമതിയായ ഓഫീസർ ഓഫ് ലീജിയൻ ഓഫ് ഓണർ നൽകി ആദരിച്ചു. ലതയുടെത് അക്ഷരാർത്ഥത്തിൽ സംഗീത കുടുംബം ആണ്. മീന ഖാദികർ, ആശാ ഭോസ്ലെ, ഉഷാ മങ്കേഷ്കർ, ഹൃദയനാഥ് മങ്കേഷ്കർ എന്നിവരുടെ മൂത്ത സഹോദരിയായിരുന്നു അവർ . ഇവരെല്ലാം മികച്ച ഗായകരും സംഗീതജ്ഞരുമാണ്.
ലതാ മങ്കേഷ്കറിന്റെ മരണവാർത്തയിൽ പ്രധാനമന്ത്രി മോദി അഗാധമായ വേദന രേഖപ്പെടുത്തി. “വാക്കുകൾക്കതീതമായി ഞാൻ വേദനിക്കുന്നു. ദയയും കരുതലും ഉള്ള ലതാ ദീദി നമ്മെ വിട്ടുപിരിഞ്ഞു. നികത്താനാവാത്ത ഒരു ശൂന്യത അവൾ നമ്മുടെ രാജ്യത്ത് അവശേഷിപ്പിക്കുന്നു. വരും തലമുറകൾ അവരെ ഇന്ത്യൻ സംസ്കാരത്തിന്റെ അമരക്കാരിയായി ഓർക്കും, അവരുടെ ശ്രുതിമധുരമായ ശബ്ദത്തിന് ആളുകളെ മയക്കാനുള്ള സമാനതകളില്ലാത്ത കഴിവുണ്ടായിരുന്നു, പ്രധാനമന്ത്രി മോദി ട്വീറ്റ് ചെയ്തു. ലതയുമായി തനിക്കുണ്ടായിരുന്ന ബന്ധവും പ്രധാനമന്ത്രി അനുസ്മരിച്ചു. “ലതാ ദീദിയിൽ നിന്ന് എനിക്ക് എപ്പോഴും അളവറ്റ വാത്സല്യം ലഭിച്ചു എന്നത് എന്റെ ബഹുമതിയായി ഞാൻ കരുതുന്നു. അവളുമായുള്ള എന്റെ ഇടപെടലുകൾ അവിസ്മരണീയമായി തുടരും. ലതാ ദീദിയുടെ വിയോഗത്തിൽ എന്റെ സഹ ഇന്ത്യക്കാരോടൊപ്പം ഞാൻ ദുഃഖിക്കുന്നു. അവളുടെ കുടുംബത്തോട് സംസാരിക്കുകയും അനുശോചനം അറിയിക്കുകയും ചെയ്തു–ട്വീറ്റിൽ പറയുന്നു.
