ഹിജാബ് ധരിച്ച പെൺകുട്ടികൾ ക്ലാസ് മുറിയിൽ പ്രവേശിച്ചതിനെച്ചൊല്ലി കർണാടകയിൽ പ്രതിഷേധം തുടരുന്നതിനിടെ, ഒരു കൂട്ടം വിദ്യാർത്ഥികൾ ശനിയാഴ്ച വീണ്ടും കാവി സ്കാർഫ് ധരിച്ച് കോളേജിലേക്ക് മാർച്ച് നടത്തി. ഉഡുപ്പി ജില്ലയിലെ കുന്ദാപൂരിൽ നിന്നുള്ള വീഡിയോകളിൽ ആൺകുട്ടികളും പെൺകുട്ടികളും കോളേജ് യൂണിഫോമിന് മുകളിൽ സ്കാർഫ് ധരിക്കുന്നതും കോളേജിലേക്ക് പോകുമ്പോൾ ‘ജയ് ശ്രീറാം’ മുദ്രാവാക്യം വിളിക്കുന്നതും കാണാം.
മറ്റൊരു സംഭവത്തിൽ, ഹിജാബ് ധരിച്ച് സ്ഥാപനത്തിലെത്തിയ കുന്ദാപൂർ പിയു കോളേജിലെ മുസ്ലീം വിദ്യാർത്ഥിനികളെ പ്രിൻസിപ്പൽ ഗേറ്റിൽ തടഞ്ഞു. ഹിജാബ് ധരിച്ച മുസ്ലീം പെൺകുട്ടികൾക്ക് എതിരായി നിരവധി ഹിന്ദു വിദ്യാർത്ഥികൾ, കൂടുതലും ആൺകുട്ടികൾ, കാവി ഷാൾ ധരിച്ചാണ് കോളേജിലെത്തിയത്.
കോളേജിലെ ഹിജാബ് നിയന്ത്രണം ചോദ്യം ചെയ്ത് ഉഡുപ്പിയിലെ സർക്കാർ പ്രീ-യൂണിവേഴ്സിറ്റി കോളേജിൽ പഠിക്കുന്ന അഞ്ച് പെൺകുട്ടികൾ സമർപ്പിച്ച ഹർജികൾ ഫെബ്രുവരി 8 ന് കർണാടക ഹൈക്കോടതി പരിഗണിക്കും.
കുട്ടികൾ സ്കൂളിൽ ഹിജാബും കാവി സ്കാർഫും ധരിക്കരുതെന്ന് കർണാടക ആഭ്യന്തര മന്ത്രി അരഗ ജ്ഞാനേന്ദ്ര വ്യാഴാഴ്ച പറഞ്ഞു.”എല്ലാ മതത്തിൽപ്പെട്ട കുട്ടികൾ ഒരുമിച്ച് പഠിക്കേണ്ട സ്ഥലമാണ് സ്കൂളുകൾ, നമ്മൾ വ്യത്യസ്തരല്ല, എല്ലാവരും ഭാരതമാതാവിന്റെ മക്കളാണ്”, ജ്ഞാനേന്ദ്ര പറഞ്ഞു. വിഷയം വലിയ വിവാദമായി മറ്റ് വിദ്യാഭ്യാസ സ്ഥാപനങ്ങളിലേക്കും വ്യാപിക്കുകയും വിഷയം ഹൈക്കോടതിയുടെ പരിഗണനയ്ക്ക് വരികയും ചെയ്ത സാഹചര്യത്തിൽ സർക്കാർ നിലപാട് സംബന്ധിച്ച് മുഖ്യമന്ത്രി ബസവരാജ് ബൊമ്മൈ വെള്ളിയാഴ്ച പ്രാഥമിക, സെക്കൻഡറി വിദ്യാഭ്യാസ മന്ത്രി ബി.സി.നാഗേഷുമായും ഉന്നത സർക്കാർ ഉദ്യോഗസ്ഥരുമായും ചർച്ച നടത്തി. .
ഉഡുപ്പിയിലെ സർക്കാർ പ്രീ-യൂണിവേഴ്സിറ്റി കോളേജിൽ ചില വിദ്യാർത്ഥികൾ ഹിജാബ് ധരിച്ചതിനെ ചൊല്ലി തർക്കം നിലനിൽക്കുന്നുണ്ട്.
