കെ.റെയില് പദ്ധതിയില് നിലപാട് മാറ്റുകയാണ് ശശി തരൂര്. കേന്ദ്രബജറ്റില് പ്രഖ്യാപിച്ച അതിവേഗ ട്രെയിനുകളായ വന്ദേഭാരത് എക്സപ്രസ് ട്രെയിനുകള് ഉണ്ടെങ്കില് ഇവിടെ സില്വര് ലൈന് ട്രെയിന് ആവശ്യമാണോ എന്നാലോചിക്കണമെന്ന് ആവശ്യപ്പെട്ട് തരൂര് രംഗത്തെത്തിക്കഴിഞ്ഞു. വന്ദേഭാരത് ട്രെയിനുകള് സില്വര് ലൈന് പദ്ധതിക്കു ബദലാകുമോ എന്നു പരിശോധിക്കേണ്ടത് അനിവാര്യമാണെന്ന് തരൂര് വ്യക്തമാക്കുന്നു. മൂന്നുവര്ഷംകൊണ്ട് 400 അതിവേഗ വന്ദേഭാരത് എക്സ്പ്രസ് തീവണ്ടികള് പുറത്തിറക്കുമെന്ന കേന്ദ്ര ബജറ്റ് പ്രഖ്യാപനത്തിന് പിന്നാലെയാണ് തരൂര് പുതിയ ചര്ച്ചകള്ക്ക് തുടക്കമിട്ടിരിക്കുന്നത്.
സമൂഹ മാധ്യമത്തിൽ പങ്കു വെച്ച കുറിപ്പ് ഇങ്ങനെ –‘ഇന്നവതരിപ്പിക്കപ്പെട്ട കേന്ദ്ര ബജറ്റില് കേരളത്തെ സംബന്ധിച്ചിടത്തോളം ശ്രദ്ധേയമായത് മണിക്കൂറില് 180 കിലോമീറ്റര് വേഗതയുള്ള 400 പുതിയ വന്ദേഭാരത് ട്രെയിനുകളുടെ പ്രഖ്യാപനമാണ്. കേന്ദ്ര സര്ക്കാരും സംസ്ഥാന സര്ക്കാരും ഈ പദ്ധതി ഇപ്പോള് കേരളത്തില് പ്രഖ്യാപിച്ചിട്ടുള്ള കെ റെയില് സില്വര്ലൈന് പദ്ധതിയെക്കാള് ചെലവ് കുറഞ്ഞതും ഊര്ജ്ജ-കാര്യക്ഷമമായതുമായ ഒരു ബദലാകുമോ എന്ന് നോക്കേണ്ടത് അത്യാവശ്യമാണ്.
വന്ദേ ഭാരത് ട്രെയിനുകളുടെ സേവനം കേരളത്തിന് ലഭിക്കുകയാണെങ്കില് കേരളത്തിന്റെ വികസനത്തിന് വേണ്ടി സംസ്ഥാനത്തിന്റെ ഒരറ്റത്ത് നിന്നും മറ്റേ അറ്റത്തേക്ക് വേഗതയുള്ള ഗതാഗത സൗകര്യം എന്ന സര്ക്കാരിന്റെ ആവശ്യകതക്കും അതേ സമയം പ്രതിപക്ഷത്തിന്റെ പ്രസ്തുത പദ്ധതിയുടെ സാമ്പത്തിക ബാധ്യത, ഭൂമി ഏറ്റെടുക്കല്, പരിസ്ഥിതി ആഘാതവുമായി ബന്ധപ്പെട്ട ആശങ്കകള്ക്കുള്ള പരിഹാരവുമായേക്കാം.”
