അടുത്ത നാലാഴ്ച നിര്ണായകമാണെന്നും അതീവ ജാഗ്രത വേണമെന്നും ആരോഗ്യ മന്ത്രി വീണാ ജോര്ജ്. അതീവ വ്യാപനശേഷിയുള്ള ഡെല്റ്റ വൈറസിന്റെ വലിയ ഭീഷണിയിലാണ് പല പ്രദേശങ്ങളും. മാത്രമല്ല മൂന്നാം തരംഗത്തിന്റെ ഭീഷണിയുമുണ്ട്. അതിനാല് തന്നെ ഓണാവധി കഴിഞ്ഞ് സ്ഥാപനങ്ങളും ഓഫീസുകളും തുറക്കുമ്പോള് എല്ലാവരും ഒരുപോലെ അതീവ ജാഗ്രത പാലിക്കണമെന്ന് മന്ത്രി വ്യക്തമാക്കി. വാക്സിന് എടുത്തു എന്ന് കരുതി ആരും ജാഗ്രത കൈവിടരുത്. അടുത്ത കാലത്തുണ്ടായ പഠനങ്ങള് സൂചിപ്പിക്കുന്നത് വാക്സിന് എടുത്തവര് മുന്കരുതലുകളെടുത്തില്ലെങ്കില് അവരിലൂടെ ഡെല്റ്റ വകഭേദം കൂടുതലായി വ്യാപിക്കുമെന്നാണ്.
സ്ഥിതി വിലയിരുത്താന് ആരോഗ്യ വകുപ്പിന്റെ അടിയന്തര യോഗം ചൊവ്വാഴ്ച രാവിലെ വിളിച്ചിട്ടുണ്ട്. പരിശോധനകള് പരമാവധി വര്ധിപ്പിക്കുന്നതാണ്. ചുമ, തൊണ്ടവേദന, പനി, ജലദോഷം, ശരീര വേദന, തലവേദന തുടങ്ങിയ രോഗലക്ഷണങ്ങളുണ്ടായാല് യാത്ര നടത്താതെ കോവിഡ് പരിശോധന നടത്തി കോവിഡല്ലെന്ന് ഉറപ്പിക്കണം. മൂക്കും വായും ശരിയായി മൂടത്തക്ക വിധം ഡബിള് മാസ്കോ എന് 95 മാസ്കോ ധരിക്കണം. വ്യക്തികള് തമ്മില് ചുരുങ്ങിയത് 2 മീറ്റര് അകലം പാലിക്കുകയും കൈകള് ഇടയ്ക്കിടയ്ക്ക് സോപ്പും വെള്ളവും ഉപയോഗിച്ച് കഴുകുകയോ സാനിറ്റൈസര് ഉപയോഗിച്ച് അണു വിമുക്തമാക്കുകയോ ചെയ്യണം.
മൂന്നാം തരംഗം മുന്നില് കണ്ട് ആരോഗ്യ വകുപ്പ് വളരെ നേരത്തെ തന്നെ മുന്നൊരുക്കങ്ങള് ആരംഭിച്ചിരുന്നു. താലൂക്ക് തലംമുതലുള്ള ആശുപത്രികളില് ഓക്സിജന് കിടക്കകളും ഐ.സി.യു.വും സജ്ജമാക്കി വരുന്നു. വെന്റിലേറ്ററുകളുടെ എണ്ണവും വര്ധിപ്പിച്ചു. ജില്ലാ ജനറല് ആശുപത്രികളിലെ ഐ.സി.യു.കളെ മെഡിക്കല് കോളേജുകളുമായി ഓണ്ലൈനായി ബന്ധിപ്പിക്കുന്നതാണ്.
വാക്സിനേഷന് ആരംഭിച്ചിട്ടില്ലാത്തതിനാല് മൂന്നാം തരംഗം ഉണ്ടായാല് അതേറെ ബാധിക്കുന്നത് കുട്ടികളെയാണെന്ന് കണ്ടെത്തിയതിനാല് പീഡിയാട്രിക് ചികിത്സാ സംവിധാനങ്ങള് വര്ധിപ്പിച്ചു വരുന്നു. 490 ഓക്സിജന് സജ്ജീകരണമുള്ള പീഡിയാട്രിക് കിടക്കകള്, 158 എച്ച്.ഡി.യു. കിടക്കകള്, 96 ഐ.സി.യു. കിടക്കകള് എന്നിങ്ങനെ ആകെ 744 കിടക്കകളാണ് കുട്ടികള്ക്കായി സജ്ജമാക്കുന്നത്.
ഓക്സിജന്റെ ലഭ്യത ഉറപ്പ് വരുത്താന് പ്രത്യേക പ്രാധാന്യം നല്കുന്നുണ്ടെന്നും മന്ത്രി വ്യക്തമാക്കി. സംസ്ഥാനത്ത് ആകെ 870 മെട്രിക് ടണ് ഓക്സിജന് കരുതല് ശേഖരമായിട്ടുണ്ട്. 33 ഓക്സിജന് ജനറേഷന് യൂണിറ്റുകളാണ് സജ്ജമാക്കി വരുന്നത്. ഇതിലൂടെ 77 മെട്രിക് ടണ് ഓക്സിജന് അധികമായി നിര്മിക്കാന് സാധിക്കും.ഇതിന് പുറമേ സര്ക്കാരിന്റെ നിര്ദേശ പ്രകാരം 13 മെട്രിക് ടണ് ഓക്സിജന് പ്രതിദിനം നിര്മ്മിക്കുന്നതിനുള്ള ഓക്സിജന് ജനറേഷന് സിസ്റ്റം സ്വകാര്യ ആശുപത്രികളില് സ്ഥാപിച്ചതായും മന്ത്രി അറിയിച്ചു.