27 അഴിമതി കേസുകൾ, 2 അഴിമതി കേസുകളിൽ ശിക്ഷ, റൂറൽ ഹൗസിങ് കുംഭ കോണത്തിൽ മുഖ്യ പ്രതി.. ഒഡിഷയിലെ ഐഎസ് ഉദ്യോഗസ്ഥൻ വിനോദ് കുമാറിന്റെ കിരീടത്തിലെ പൊൻതൂവലുകളാണിവ.
തൂവലുകളുടെ എണ്ണം കൂടിയപ്പോൾ ഒഡിഷ സർക്കാരിന്റെ ശുപാർശയിൽ കേന്ദ്ര സർക്കാർ പാരിതോഷികമായി ‘ഡിസ്മിസലും’ അടിച്ചു കൊടുത്തു.
1999 ൽ ഒഡിഷ തീരത്ത് ആഞ്ഞടിച്ച ചുഴലിക്കാറ്റിൽ വന്ന നാശനഷ്ടത്തിൽ ഒഡിഷയിലെ റൂറൽ ഹൗസിങ് വികസന കോർപറേഷന്റെ മാനേജിങ് ഡയറക്ടർ ആയിരിക്കെ വിനോദ് കുമാർ 33 കോടിയോളം രൂപ അനധികൃതമായി വകമാറ്റിയെന്നാണ് ഒരു കേസ്.
2000-2001 കാലത്ത്, മതിയായ ഈട് വാങ്ങാതെയും പരിശോധന നടത്താതെയും കരാറുകാർക്കും കെട്ടിടനിർമാതാക്കൾക്കും ലോൺ അനുവദിച്ചതിനും ഇയാൾക്കെതിരെ വിജിലൻസ് കേസുകൾ ഉണ്ട്.
2001 ൽ ഇയാളെ അന്വേഷണ വിധേയമായി സസ്പെൻഡ് ചെയ്തെങ്കിലും വീണ്ടും സർവീസിൽ നിയമിക്കുകയായിരുന്നു.
2018 ൽ ഒരു കോടിയോളം രൂപയുടെ സാമ്പത്തിക ക്രമക്കേടുകൾ കണ്ടെത്തി പ്രത്യേക വിജിലൻസ് കോടതി ഇയാളെ മൂന്ന് വർഷ തടവിന് വിധിച്ചിരുന്നു. ഉന്നത വിദ്യാഭ്യാസ വകുപ്പിൽ സ്പെഷ്യൽ ഡ്യൂട്ടി ഓഫീസർ ആയിരിക്കെയാണ് വിനോദ് കുമാറിനെ സർവീസിൽ നിന്നും പിരിച്ചുവിടുന്നത്.