ജമാഅത്തുകാർ അഞ്ച്‌ അടിയാണത്രെ തലയ്ക്ക്‌ അടിച്ചത്‌…ഗവർണറെ രൂക്ഷമായി പരിഹസിച്ച് ടി.സിദ്ദിഖ്

ഗവർണർ ആരിഫ് മുഹമ്മദ് ഖാനെ കെപിസിസി അധ്യക്ഷൻ ഉൾപ്പെടെ ചില നേതാക്കൾ പരോക്ഷ പിന്തുണ നൽകുന്ന രീതിയിൽ സംസാരിക്കുന്നതിനിടെ ഗവർണറെ രൂക്ഷമായി പരിഹസിച്ച് കോൺഗ്രസ് എംഎൽഎ ടി.സിദ്ദിഖ്. ഗവർണറുടെ ഒരു പ്രതികരണത്തിന്റെ സ്ക്രീൻഷോട്ട് പങ്കിട്ടാണ് സിദ്ദിഖിന്റെ പരിഹാസം. ജമാഅത്തുകാർ ദണ്ഡ് കൊണ്ട് തന്റെ തലയ്ക്ക് അടിച്ചെന്ന് ഗവർണറുടെ ആരോപണത്തിന്റെ വാർത്തയാണ് അദ്ദേഹം പങ്കുവയ്ക്കുന്നത്.‘അന്ന് തലയ്ക്കു കിട്ടിയ അടിയാണ് ഇന്ന് ഈ അവസ്ഥയിൽ ആകാൻ കാരണം. എവിടെയാ ഇരിക്കുന്നതെന്ന് അറിയില്ല, എന്താ പറയുന്നതെന്ന് അറിയുന്നില്ല. ജമാഅത്തുകാർ അഞ്ച്‌ അടിയാണത്രെ ഗവർണ്ണറുടെ തലയ്ക്ക്‌ അടിച്ചത്‌..! ശ്രീ പിണറായി വിജയനും ഗവർണ്ണറും തമ്മിലുള്ള പോരു കണ്ട്‌ ജനങ്ങൾ ചിരിക്കുന്നുണ്ട്‌..’ സിദ്ദിഖ് കുറിച്ചു.