വീണ്ടും ദുരഭിമാനക്കൊലയുടെ ഭീകരമുഖം. മിശ്രവിവാഹം ചെയ്ത 25-കാരനെ ഭാര്യയുടെ വീട്ടുകാര് വെട്ടിക്കൊന്നു. ഹൈദരാബാദിലാണ് സംഭവം. ബുധനാഴ്ച രാത്രി സരൂര്നഗര് പോലീസ് സ്റ്റേഷന് പരിധിയില് പെട്ട സ്ഥലത്ത് ആണ് ക്രൂരമായ കൊലപാതകം അരങ്ങേറിയത്. ബൈക്കില് ഭാര്യ അഷ്റിന് സുല്ത്താനയ്ക്കൊപ്പം പോകുകയായിരുന്ന നാഗരാജു എന്നയാളെയാണ് നാലഞ്ചുപേര് ചേര്ന്ന് അടിച്ചു വീഴ്ത്തിയ ശേഷം വെട്ടിക്കൊന്നത്. അഷ്റിന് കേണപേക്ഷിച്ചിട്ടും പ്രതിഷേധിച്ചിട്ടും അക്രമികള് പിന്മാറിയില്ല. അക്രമത്തിന്റെ വീഡിയോ പുറത്തു വന്നതിനെത്തുടര്ന്നാണ് ലോകം ഈ സംഭവത്തിന്റെ വിശദാംശം അറിയുന്നത്. നാഗരാജുവിനെ വിടണമെന്ന് അഭ്യർത്ഥിച്ചിട്ടും സഹോദരനും മറ്റ് ചിലരും ചേർന്ന് ആക്രമിക്കുകയായിരുന്നുവെന്ന് സുൽത്താന ആരോപിച്ചു. കൊലപാതകവുമായി ബന്ധപ്പെട്ട് രണ്ട് പേരെ വ്യാഴാഴ്ച പോലീസ് അറസ്റ്റ് ചെയ്തു. സുൽത്താനയുടെ സഹോദരനെയും ഭാര്യാ സഹോദരനെയും ആണ് അറസ്റ്റ് ചെയ്തതെന്ന് പോലീസ് പറഞ്ഞു.
രംഗറെഡ്ഡി ജില്ലയിലെ മാർപള്ളി ഗ്രാമവാസിയായ നാഗരാജും സമീപ ഗ്രാമമായ ഘനാപൂരിലെ സുൽത്താനയും കഴിഞ്ഞ ഏഴു വർഷമായി പ്രണയത്തിലായിരുന്നു. എന്നാൽ, സുൽത്താനയുടെ കുടുംബം ഈ കൂട്ടുകെട്ടിനെ എതിർത്തു. ബന്ധം തുടരുന്നതിനെതിരെ അവർ മുന്നറിയിപ്പ് നൽകി. ഈ വർഷം ആദ്യം പെൺകുട്ടി നാഗരാജുവിനൊപ്പം ഒളിച്ചോടി, ജനുവരി 31 ന് ലാൽ ദർവാസ ഏരിയയിലെ ആര്യസമാജ ക്ഷേത്രത്തിൽ വച്ച് പെൺകുട്ടി പല്ലവി എന്ന് പേര് മാറ്റിയതിന് ശേഷം പ്രണയിതാക്കൾ വിവാഹിതരായി. ജീവന് ഭീഷണിയുണ്ടെന്ന് മനസ്സിലാക്കിയ ദമ്പതികൾ വിശാഖപട്ടണത്തേക്ക് പോയിരുന്നു.
അഞ്ച് ദിവസം മുമ്പ് ഹൈദരാബാദിൽ തിരിച്ചെത്തിയ ഇവർ സരൂർനഗറിലെ കോളനിയിൽ താമസിക്കുകയായിരുന്നുവെന്ന് നാഗരാജുവിന്റെ മാതാപിതാക്കൾ പറയുന്നു. എന്നാൽ സുൽത്താനയുടെ കുടുംബാംഗങ്ങൾ അവരുടെ വരവ് അറിഞ്ഞ് നീക്കം നിരീക്ഷിക്കുകയായിരുന്നു. ബുധനാഴ്ച രാത്രി നാഗരാജുവും ഭാര്യയും ബൈക്കിൽ വീടുവിട്ടിറങ്ങിയപ്പോൾ യുവതിയുടെ സഹോദരനും മറ്റുള്ളവരും ഇവരെ പിന്തുടർന്ന് ജിഎച്ച്എംസി ഓഫീസിന് സമീപം വെച്ച് ആക്രമിക്കുകയായിരുന്നു.
