ഇന്ത്യയുടെ ചീഫ് ജസ്റ്റിസ് ജസ്റ്റിസ് സഞ്ജീവ് ഖന്ന, അടുത്ത ചീഫ് ജസ്റ്റിസായി ജസ്റ്റിസ് ബിആർ ഗവായിയുടെ പേര് കേന്ദ്ര നിയമ മന്ത്രാലയത്തിന് ശുപാർശ ചെയ്തതായി വാർത്താ ഏജൻസിയായ പിടിഐ ബുധനാഴ്ച റിപ്പോർട്ട് ചെയ്തു.
ഖന്ന വിരമിച്ചതിന്റെ പിറ്റേന്ന് മെയ് 14 ന് ജസ്റ്റിസ് ഗവായ് ഇന്ത്യയുടെ അടുത്ത ചീഫ് ജസ്റ്റിസായി സത്യപ്രതിജ്ഞ ചെയ്യും. സത്യപ്രതിജ്ഞ ചെയ്തുകഴിഞ്ഞാൽ, ഇന്ത്യയുടെ ചീഫ് ജസ്റ്റിസാകുന്ന രണ്ടാമത്തെ ദളിതനായിരിക്കും ജസ്റ്റിസ് ഗവായ് . 2007 ൽ നിയമിതനായ ജസ്റ്റിസ് കെ ജി ബാലകൃഷ്ണൻ ആയിരുന്നു ദളിത് വിഭാഗത്തിൽ നിന്നുള്ള ആദ്യ ചീഫ് ജസ്റ്റിസ്.
കീഴ്വഴക്കമനുസരിച്ച് നിലവിലെ ചീഫ് ജസ്റ്റിസ് തന്റെ പിൻഗാമിയെ നാമനിർദ്ദേശം ചെയ്തുകൊണ്ട് കേന്ദ്ര നിയമ മന്ത്രാലയത്തിന് നിർദ്ദേശം അയക്കുകയാണ് ചെയ്യുക. മന്ത്രാലയം നേരത്തെ തന്നെ പിൻഗാമിയെ നാമനിർദ്ദേശം ചെയ്യുന്നതിനായി നിലവിലെ ചീഫ് ജസ്റ്റിസിന്റെ നിർദ്ദേശം തേടിയിരുന്നു.
