സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനെതിരെ വനിതാ കമ്മീഷനിൽ പരാതി. സി.പി.എമ്മിന്റെ പുതിയ ഭാരവാഹി പ്രഖ്യാപനത്തിന്റെ ഭാഗമായി നടത്തിയ വാർത്താ സമ്മേളനത്തിൽ സ്ത്രീ വിരുദ്ധ പരാമർശങ്ങൾ നടത്തിയെന്ന് ആരോപിച്ചാണ് മുൻ ഹരിത ദേശീയ വൈസ് പ്രസിഡന്റ് അഡ്വ. ഫാത്തിമ തഹ്ലിയ സംസ്ഥാന വനിതാ കമ്മീഷനിൽ പരാതി നല്കിയത്.
സംസ്ഥാന കമ്മിറ്റിയില് വനിതാ പ്രാതിനിധ്യം വര്ധിപ്പിക്കുമോയെന്ന ചോദ്യത്തിന് എല്ലാ കമ്മിറ്റിയിലും പ്രാതിനിധ്യം വര്ധിപ്പിക്കുമെന്ന് കോടിയേരി മറുപടി പറഞ്ഞു. എന്നാൽ പ്രാതിനിധ്യം 50 ശതമാനമാക്കുമോയെന്ന ചോദ്യത്തിന്, ‘നിങ്ങള് പാര്ട്ടിയെ തകര്ക്കാന് നടക്കുന്നതാണോ, പ്രായോഗിക നിര്ദേശം നല്കാന് നടക്കുന്നതാണോ’ എന്ന് കോടിയേരി തമാശ രൂപേണ ചോദിച്ചു.
പരാമർശം പൊതുപ്രവർത്തകരായ സ്ത്രീകളെ അപമാനിക്കുന്നതിന് തുല്യമാണെന്നും കോടിയേരിയുടെ സ്ത്രീവിരുദ്ധ പരാമർശങ്ങൾക്കെതിരെ ശക്തമായ നടപടി കൈക്കൊള്ളണമെന്നും ഫാത്തിമ തഹ്ലിയ പരാതിയിൽ ആവശ്യപ്പെടുന്നു.
