ഹിജാബ് ധരിച്ച ഒരു വിദ്യാര്ഥി പഠിക്കുന്നുണ്ടോ ഇല്ലയോ എന്നത് ക്ലാസില് അധ്യാപകന് എങ്ങിനെ തിരിച്ചറിയാനാവുമെന്നും മുസ്ലീം സമുദായത്തിന് ഹിജാബ് അല്ല വിദ്യാഭ്യാസമാണ് ആവശ്യമെന്നും അസം മുഖ്യമന്ത്രി ഹിമന്ത ബിസ്വ ശര്മ്മ പറഞ്ഞു. ഉത്തരാഖണ്ഡിലെ കിച്ചയില് തിരഞ്ഞെടുപ്പു പ്രചാരണത്തിനിടിയില് കര്ണാടകത്തിലെ ഹിജാബ് വിഷയത്തില് പ്രതികരിക്കുകയായിരുന്നു ശര്മ്മ.
“ഒരു വിദ്യാർത്ഥി പഠിക്കുന്നുണ്ടോ ഇല്ലയോ എന്ന്, അവർ ഹിജാബ് ധരിച്ചാൽ ഒരു അധ്യാപകന് എങ്ങനെ അറിയാം? 3 വർഷം മുമ്പ് ഹിജാബ് ധരിക്കണമെന്ന് ആരും പറഞ്ഞില്ലേ? മുസ്ലീം സമുദായത്തിന് വിദ്യാഭ്യാസമാണ് വേണ്ടത്, ഹിജാബല്ല. പൊളിറ്റിക്കൽ ഇസ്ലാം കോൺഗ്രസ് സ്പോൺസർ ചെയ്തതാണ്,” ഉത്തരാഖണ്ഡിലെ കിച്ചയിൽ ഒരു റാലിയെ അഭിസംബോധന ചെയ്ത് ശർമ്മ പറഞ്ഞു.
രാജ്യത്തെ വിഭജിക്കാൻ കോൺഗ്രസ് ശ്രമിക്കുന്നത് ആശങ്കാജനകമാണെന്നും അദ്ദേഹം കൂട്ടിച്ചേർത്തു. ഇന്ത്യ ഒരു രാഷ്ട്രമല്ലെന്നും സംസ്ഥാനങ്ങളുടെ യൂണിയനാണെന്നും അവർ ചിലപ്പോൾ പറയുന്നു. ഇതെല്ലാം കേൾക്കുമ്പോൾ ജിന്നയുടെ ആത്മാവ് കോൺഗ്രസിൽ പ്രവേശിച്ചോ എന്ന് തോന്നും. ഇവർ ‘ടുക്ഡെ ടുക്ഡെ’ സംഘത്തെ പ്രതിനിധീകരിക്കുന്നു. 1947-ന് മുമ്പുള്ള സാഹചര്യം ആവർത്തിക്കുക എന്ന ഒറ്റ ലക്ഷ്യമേ അവർക്കുള്ളൂ,” അദ്ദേഹം പറഞ്ഞു.
