ആശുപത്രികളില് പ്രവേശിപ്പിക്കുന്നവരുടെ എണ്ണം അടിസ്ഥാനമാക്കി കൊല്ലം, പത്തനംതിട്ട , കോട്ടയം, ഇടുക്കി എന്നീ ജില്ലകള് കൂടി കാറ്റഗറി മൂന്നില് (സി-വിഭാഗം) ഉൾപ്പെടുത്താന് മുഖ്യമന്ത്രി പിണറായി വിജയന്റെ അധ്യക്ഷതയില് ഇന്ന് ചേർന്ന കോവിഡ് അവലോകന യോഗം തീരുമാനിച്ചു.
തിരുവനന്തപുരം ജില്ല നേരത്തെ സി കാറ്റഗറിയില് ആയിരുന്നു.ആലപ്പുഴ, എറണാകുളം, തൃശ്ശൂര്, പാലക്കാട്, വയനാട്, കണ്ണൂര് ജില്ലകള് കാറ്റഗറി രണ്ടിലും, മലപ്പുറം, കോഴിക്കോട് ജില്ലകള് കാറ്റഗറി ഒന്നിലുമാണ്.
വെള്ളിയാഴ്ച മുതല് ഈ ജില്ലകളില് നേരത്തെ നിശ്ചയിച്ച പ്രകാരമുള്ള നിയന്ത്രണങ്ങള് ഏര്പ്പെടുത്തും. കാസര്ഗോഡ് ജില്ല നിലവില് ഒരു കാറ്റഗറിയിലും ഉള്പ്പെട്ടിട്ടില്ല.
സെക്രട്ടേറിയറ്റില് ഐ.എ.എസ്. ഉദ്യോഗസ്ഥരുടെ നേതൃത്വത്തില് കോവിഡ് വാര് റൂം പുനരാരംഭിച്ചു. കോവിഡ് ബെഡ്ഡ്, ഐ.സി.യു ബെഡ്ഡ്, വെന്റിലേറ്റര് ഉള്പ്പെടെയുള്ളവയും ഇതിലൂടെ മോണിറ്റര് ചെയ്യും. കോവിഡ് രോഗികളുടെ എണ്ണം വര്ദ്ധിക്കുമ്പോള് ആനുപാതികമായി ആശുപത്രികളിലും തിരക്ക് വര്ദ്ധിക്കുമെന്നതിനാല് മുന്കരുതല് എടുക്കാന് മുഖ്യമന്ത്രി നിര്ദ്ദേശിച്ചു.
കരുതല്വാസ കേന്ദ്രങ്ങള് ആരംഭിക്കുന്നതിനുള്ള നടപടികള് സ്വീകരിക്കും . കോവിഡ് ജാഗ്രതാസമിതികള് ശക്തിപ്പെടുത്തും. ആശുപത്രികളില് ചികിത്സയ്ക്ക് മുമ്പ് രോഗലക്ഷണം ഉണ്ടെങ്കില് മാത്രം കോവിഡ് പരിശോധന നടത്തിയാല് മതിയെന്ന ആരോഗ്യ വിദഗ്ധസമിതിയുടെ അഭിപ്രായവും യോഗം അംഗീകരിച്ചു. ഡയാലിസിസ് സൗകര്യമുള്ള സ്വകാര്യ ആശുപത്രികളിൽ കോവിഡ് രോഗികൾക്ക് ഡയാലിസിസിന് പ്രത്യേക സംവിധാനമൊരുക്കണമെന്നും മുഖ്യമന്ത്രി യോഗത്തില് നിർദേശിച്ചു.
