സിപിഎം നേതാവും മുൻ പശ്ചിമ ബംഗാൾ മുഖ്യമന്ത്രിയുമായ ബുദ്ധദേവ് ഭട്ടാചാര്യ വ്യാഴാഴ്ച കൊൽക്കത്തയിൽ അന്തരിച്ചു. അദ്ദേഹത്തിന് 80 വയസ്സായിരുന്നു. പുലർച്ചെ ആരോഗ്യനില വഷളായി. രാവിലെ 8.20 ഓടെ മരിച്ചു. ഭട്ടാചാര്യയുടെ ഭാര്യ മീരയും മകൾ സുചേതനയും മരണ സമയത്ത് അടുത്തുണ്ടായിരുന്നു. സംസ്കാരം വെള്ളിയാഴ്ച നടത്തുമെന്നു സിപിഎം സംസ്ഥാന സെക്രട്ടറി മുഹമ്മദ് സലിം പറഞ്ഞു.
തെക്കൻ കൊൽക്കത്തയിലെ ബാലിഗഞ്ച് ഏരിയയിലെ ഒരു ചെറിയ രണ്ട് മുറികളുള്ള സർക്കാർ അപ്പാർട്ട്മെൻ്റിൽ താമസിച്ചിരുന്ന ഭട്ടാചാരി, വിട്ടുമാറാത്ത ശ്വാസകോശ സംബന്ധമായ അസുഖം ബാധിച്ച് കഴിഞ്ഞ കുറച്ച് വർഷങ്ങളായി വീട്ടിൽ ഒതുങ്ങിനിൽക്കുകയായിരുന്നു. തെക്കൻ കൊൽക്കത്തയിലെ ആശുപത്രിയിലും വീട്ടിലുമായി ചികിത്സയിലായിരുന്നു അദ്ദേഹം.
2 011 ലെ നിയമസഭാ തെരഞ്ഞെടുപ്പിൽ സിപിഎം നേതൃത്വത്തിലുള്ള ഇടതുമുന്നണി നേരിട്ട പരാജയത്തിന് മുമ്പ് 2001 മെയ് മുതൽ തുടർച്ചയായി രണ്ട് തവണ ബുദ്ധദേവ് മുഖ്യമന്ത്രിയായിരുന്നു . 1977 മുതൽ മുഖ്യമന്ത്രിയായിരുന്ന ജ്യോതി ബസുവിന്റെ പിൻഗാമി ആയിരുന്നു അദ്ദേഹം. 1977 മുതൽ 2011 വരെ സിപിഎം പശ്ചിമ ബംഗാളിൽ തുടർച്ചയായി ഭരിച്ചിരുന്നു. 2022-ൽ കേന്ദ്രസർക്കാർ ഏറ്റവും ഉയർന്ന മൂന്നാമത്തെ സിവിലിയൻ ബഹുമതിയായ പത്മഭൂഷൺ പ്രഖ്യാപിച്ചെങ്കിലും സ്വീകരിക്കാൻ ഭട്ടാചാര്യ വിസമ്മതിച്ചു. അവാർഡിനെക്കുറിച്ച് തനിക്ക് ഒന്നും അറിയില്ലെന്നും ആരും തന്നോട് ഇതേക്കുറിച്ച് ഒന്നും പറഞ്ഞിട്ടില്ലെന്നും അദ്ദേഹം അന്ന് പറയുകയുണ്ടായി .
