2016 ഏപ്രിൽ 28 ന് പെരുമ്പാവൂരിൽ നിയമ വിദ്യാർത്ഥിനി ജിഷയെ ബലാത്സംഗം ചെയ്ത് കൊലപ്പെടുത്തിയ കേസിൽ അസമിൽ നിന്നുള്ള കുടിയേറ്റ തൊഴിലാളി മുഹമ്മദ് അമീർ-ഉൾ ഇസ്ലാമിൻ്റെ വധശിക്ഷ നടപ്പാക്കുന്നത് സുപ്രീം കോടതി ചൊവ്വാഴ്ച സ്റ്റേ ചെയ്തു. കേരള ഹൈക്കോടതിയുടെ വധശിക്ഷ ശരിവച്ചതിനെതിരെ പ്രതി നൽകിയ അപ്പീൽ പരിഗണിച്ച് ജസ്റ്റിസുമാരായ ബിആർ ഗവായ്, സഞ്ജയ് കരോൾ, കെവി വിശ്വനാഥൻ എന്നിവരടങ്ങിയ ബെഞ്ച് , പ്രതിയുടെ സാഹചര്യങ്ങളും മാനസിക വിലയിരുത്തലും സംബന്ധിച്ച് റിപ്പോർട്ട് തേടി. “വധശിക്ഷ നടപ്പാക്കുന്നത് നിലവിലെ അപ്പീലിൻ്റെ വാദം കേൾക്കുന്നതിനായും അന്തിമ തീർപ്പാക്കുന്നതുവരെയും സ്റ്റേ ചെയ്യും.”– കോടതി ഉത്തരവിട്ടു.
ഡൽഹി നാഷണൽ ലോ യൂണിവേഴ്സിറ്റിയുടെ പ്രോജക്റ്റ് 39എ കുറ്റവാളിക്ക് നിയമസഹായം നൽകി. അഭിഭാഷകയായ ശ്രേയ രസ്തോഗിയാണ് അദ്ദേഹത്തിനുവേണ്ടി ഹാജരായത്.
കോടതി ഇനിപ്പറയുന്ന നിർദ്ദേശങ്ങൾ പുറപ്പെടുവിച്ചു:
എട്ട് ആഴ്ചയ്ക്കുള്ളിൽ അപ്പീലുമായി ബന്ധപ്പെട്ട എല്ലാ പ്രൊബേഷൻ ഓഫീസർമാരുടെയും റിപ്പോർട്ട് സംസ്ഥാനം കോടതിയിൽ സമർപ്പിക്കും. പ്രതി വിയ്യൂർ ജയിലിൽ ആയിരുന്നപ്പോൾ ചെയ്ത ജോലിയുടെ സ്വഭാവം സംബന്ധിച്ച ഒരു റിപ്പോർട്ടും പെരുമാറ്റം സംബന്ധിച്ച റിപ്പോർട്ടും സമർപ്പിക്കണം.
നിലവിൽ കേരളത്തിലെ വിയ്യൂരിലെ സെൻട്രൽ പ്രിസൺ & കറക്ഷണൽ ഹോമിൽ കഴിയുന്ന പ്രതിക്ക് ശിക്ഷാവിധിയുമായി ബന്ധപ്പെട്ട വിവരങ്ങൾ ശേഖരിക്കുന്നതിനും അന്വേഷണ റിപ്പോർട്ട് സമർപ്പിക്കുന്നതിനുമായി വ്യക്തിഗത അഭിമുഖങ്ങൾ നടത്തുന്നതിന് ശ്രീമതി നൂരിയ അൻസാരിക്ക് കോടതി അനുമതി നൽകി. പന്ത്രണ്ട് ആഴ്ചയ്ക്കുള്ളിൽ അഭിമുഖം നടത്തണം.
അഭിമുഖങ്ങൾ ജയിൽ ഉദ്യോഗസ്ഥനോ പോലീസ് ഉദ്യോഗസ്ഥരോ കേൾക്കാതെ പ്രത്യേക അഭിമുഖ സ്ഥലത്ത് നടത്തുന്നുവെന്നും ഓഡിയോ റെക്കോർഡറുകൾ ഉപയോഗിക്കാൻ അനുവദിക്കുന്നുണ്ടെന്നും ഉറപ്പാക്കണം. നൂരിയ അൻസാരി നാമനിർദ്ദേശം ചെയ്യുന്ന ഒരു വ്യക്തിക്ക് അഭിമുഖ സമയത്ത് പരിഭാഷ നടത്താൻ ഒപ്പം അനുഗമിക്കാൻ അനുവാദം നൽകി. മെഡിക്കൽ രേഖകൾ, ജയിലിലെ പെരുമാറ്റം, വിദ്യാഭ്യാസ,തൊഴിൽ അവസരങ്ങളുടെ സർട്ടിഫിക്കറ്റുകൾ എന്നിവ ഉൾപ്പെടെ, എന്നാൽ അതിൽ മാത്രം പരിമിതപ്പെടുത്താതെ, അപേക്ഷകനെ സംബന്ധിച്ച എല്ലാ രേഖകളും ലഭിക്കുന്നതിന് നൂറിയ അൻസാരിക്ക് കോടതി അനുമതി നൽകി.
