അടുത്ത രണ്ടോ മൂന്നോ മാസത്തിനുള്ളിൽ വംശീയ സംഘർഷത്തിന് പരിഹാരം കാണുമെന്ന് മണിപ്പൂർ മുഖ്യമന്ത്രി എൻ ബിരേൻ സിംഗ്. വെള്ളിയാഴ്ച അന്താരാഷ്ട്ര യോഗാ ദിനത്തോടനുബന്ധിച്ച് ഇംഫാലിൽ മാധ്യമങ്ങളോട് സംസാരിക്കവെ, നരേന്ദ്ര മോദി ഗവൺമെൻ്റാണ് സംഘർഷഭരിതമായ സംസ്ഥാനത്തിന്റെ സമാധാനത്തിന് മുൻഗണന നൽകുന്നതെന്ന് അദ്ദേഹം പറഞ്ഞു.
“മോദിജിയുടെ കീഴിലുള്ള മൂന്നാമത്തെ സർക്കാർ സമാധാനം കൊണ്ടുവരാൻ മണിപ്പൂരിന് പ്രഥമ പരിഗണന നൽകുന്നു. ഇതനുസരിച്ച് കേന്ദ്ര ആഭ്യന്തര മന്ത്രി അമിത് ഷാ എല്ലാ ഏജൻസികളുമായും ഉന്നതതല സുരക്ഷാ യോഗം വിളിച്ചിരുന്നു. ഒരു ആക്ഷൻ പ്ലാൻ തീർച്ചയായും വരും. രണ്ടോ മൂന്നോ മാസത്തിനുള്ളിൽ എന്തെങ്കിലും പരിഹാരമുണ്ടാകുമെന്ന് ഞാൻ പ്രതീക്ഷിക്കുന്നു.” — സിംഗ് പറഞ്ഞു.
ചില പോക്കറ്റുകൾ ഒഴികെ എല്ലായിടത്തും സ്കൂളുകളും വ്യാപാര സ്ഥാപനങ്ങളും തുറന്നിട്ടുണ്ടെന്ന് അദ്ദേഹം പറഞ്ഞു. സുരക്ഷാ ഉദ്യോഗസ്ഥരുടെ അഭാവം മൂലം ജിരിബാമിലും മറ്റിടങ്ങളിലും ചില ചെറിയ സംഭവങ്ങൾ ഉണ്ടായിട്ടുണ്ടെന്ന് സിംഗ് പറഞ്ഞു. തിരഞ്ഞെടുപ്പ് ജോലികൾക്കായി സംസ്ഥാനം വിട്ട സേന തിരിച്ചെത്തി വിവിധ പ്രദേശങ്ങളിലേക്ക് വിന്യസിച്ചതിനാൽ സ്ഥിതിഗതികൾ മെച്ചപ്പെടുമെന്ന് മുഖ്യമന്ത്രി പ്രത്യാശ പ്രകടിപ്പിച്ചു. അനധികൃത കുടിയേറ്റക്കാരുടെ കടന്നുകയറ്റവും മയക്കുമരുന്ന് കടത്തലുമാണ് സംഘർഷത്തിൻ്റെ മൂലകാരണമെന്ന് മുഖ്യമന്ത്രി അവകാശപ്പെട്ടു.
കഴിഞ്ഞ വർഷം മെയ് 3 ന് പൊട്ടിപ്പുറപ്പെട്ട മണിപ്പൂരിലെ വംശീയ സംഘർഷത്തിൽ കുറഞ്ഞത് 219 പേർ കൊല്ലപ്പെടുകയും 60,000 ത്തിലധികം പേർ പലായനം ചെയ്യുകയും ചെയ്തു. സംസ്ഥാനം ഇപ്പോഴും വംശീയമായി വിഭജിക്കപ്പെട്ടിരിക്കുന്നു.
