ചരക്ക് സേവന നികുതിയുടെ (ജിഎസ്ടി) കേന്ദ്ര-സംസ്ഥാന നികുതി പങ്കിടൽ അനുപാതം പുനഃപരിശോധിക്കണമെന്ന് കേരള ധനമന്ത്രി കെ എൻ ബാലഗോപാൽ ആവശ്യപ്പെട്ടു. 60 ശതമാനം സംസ്ഥാനങ്ങളിലേക്ക് നൽകണമെന്നും എന്നാൽ ഇപ്പോൾ അത് 50-50 എന്ന നിലയിൽ തുല്യമായി പങ്കിടുകയാണെന്നും ബാലഗോപാൽ ചൂണ്ടിക്കാട്ടി. നിലവിൽ ഈ അനുപാതം 50:50 ആണെന്നും അത് സംസ്ഥാനങ്ങൾക്ക് അനുകൂലമായി 40:60 ആക്കി മാറ്റണമെന്നും ശനിയാഴ്ച ന്യൂഡൽഹിയിൽ നടന്ന ജിഎസ്ടി കൗൺസിൽ യോഗത്തിൽ മന്ത്രി പറഞ്ഞു.
സംയോജിത ചരക്ക് സേവന നികുതി (ഐജിഎസ്ടി) സംബന്ധിച്ച് എടുത്ത അനുകൂല തീരുമാനം കേരളത്തിന് ഏറെ ഗുണം ചെയ്യുമെന്ന് പ്രതീക്ഷിക്കുന്നതായി ധനമന്ത്രി പറഞ്ഞു. സാധാരണയായി ഇ-കൊമേഴ്‌സ് പ്ലാറ്റ്‌ഫോമുകളിലൂടെ ബിസിനസ്സ് ചെയ്യുമ്പോൾ ഇ-കൊമേഴ്‌സ് ഓപ്പറേറ്റർമാരുടെ ജിഎസ്ടി ചാർജുകൾ വിശദമാക്കുന്ന ഒരു ജിഎസ്ടിആർ-8 റിട്ടേൺ ഫയൽ ചെയ്യേണ്ടതുണ്ട്. ജിഎസ്ടിആർ-8 റിട്ടേണിൽ നികുതി നൽകേണ്ട സംസ്ഥാനത്തെക്കുറിച്ചുള്ള വിശദാംശങ്ങളും നികുതിയുടെ തുകയും ഉൾപ്പെടുത്താൻ യോഗത്തിൽ തീരുമാനിച്ചത് കേരളത്തിന് ഗുണം ചെയ്യുന്ന നിർണായക തീരുമാനമാണെന്നു ബാലഗോപാൽ പറഞ്ഞു.
ആമസോൺ, ഫ്ലിപ്കാർട്ട് തുടങ്ങിയ ഇ-കൊമേഴ്‌സ് പ്ലാറ്റ്‌ഫോമുകളിലൂടെ സാധനങ്ങളും സേവനങ്ങളും വിൽക്കുന്നവർ ഇവിടത്തെ ഉപഭോക്താക്കളിൽ നിന്ന് ഐജിഎസ്ടി ഈടാക്കുന്നു. എന്നാൽ അവർ സമർപ്പിച്ച റിട്ടേണുകളിൽ ഉപഭോക്തൃ സംസ്ഥാനം വ്യക്തമാക്കാത്തതിനാൽ നികുതി വിഹിതം ഇപ്പോൾ കേരളത്തിന് ലഭിക്കുന്നില്ല.– മന്ത്രി വിശദീകരിച്ചു.
