ജനങ്ങളുടെ ഇടയിൽ വിഘടനവാദ പ്രവണത വളർത്തിയതിനും രാജ്യത്ത്, പ്രത്യേകിച്ച് തമിഴ്നാട്ടിൽ ഇന്ത്യയുടെ പ്രാദേശിക അഖണ്ഡതയ്ക്ക് ഭീഷണിയാകുന്നതിനും എൽടിടിഇയുടെ മേൽ ഏർപ്പെടുത്തിയ നിരോധനം കേന്ദ്രം ചൊവ്വാഴ്ച അഞ്ച് വർഷത്തേക്ക് കൂടി നീട്ടി.
1967ലെ നിയമവിരുദ്ധ പ്രവർത്തനങ്ങൾ (തടയൽ) നിയമത്തിലെ സെക്ഷൻ 3-ലെ ഉപവകുപ്പുകൾ (1), (3) എന്നിവ ഉപയോഗിച്ചാണ് കേന്ദ്ര ആഭ്യന്തര മന്ത്രാലയം നിരോധനം ഏർപ്പെടുത്തിയത്. എൽടിടിഇ ശ്രീലങ്ക ആസ്ഥാനമായുള്ള സംഘടനയാണെന്നും എന്നാൽ ഇന്ത്യയുടെ പ്രദേശത്ത് പിന്തുണക്കാരും അനുഭാവികളും ഏജൻ്റുമാരും ഉണ്ടെന്നും ആഭ്യന്തര മന്ത്രാലയം ഒരു അറിയിപ്പിൽ ചൂണ്ടിക്കാട്ടി.
രാജ്യത്തിൻ്റെ അഖണ്ഡതയ്ക്കും സുരക്ഷയ്ക്കും കോട്ടംതട്ടുന്ന പ്രവർത്തനങ്ങളാണ് എൽ.ടി.ടി.ഇ ഇപ്പോഴും നടത്തുന്നതെന്നാണ് കേന്ദ്ര സർക്കാരിൻ്റെ അഭിപ്രായം.
2009 മെയ് മാസത്തിൽ ശ്രീലങ്കയിൽ സൈനിക തോൽവിക്ക് ശേഷവും എൽ.ടി.ടി.ഇ ‘ഈഴം ‘ (തമിഴർക്ക് സ്വതന്ത്ര രാജ്യം) എന്ന സങ്കൽപ്പം ഉപേക്ഷിച്ചിട്ടില്ലെന്നും ധനസമാഹരണവും നടത്തി ‘ഈഴം’ ലക്ഷ്യത്തിനായി രഹസ്യമായി പ്രവർത്തിച്ചു വരികയാണെന്നും സർക്കാർ ആരോപിക്കുന്നു . ചിതറിപ്പോയ പ്രവർത്തകരെ പുനഃസംഘടിപ്പിക്കാനും പ്രാദേശികമായും അന്തർദേശീയമായും സംഘടനയെ പുനരുജ്ജീവിപ്പിക്കാനും പ്രചാരണ പ്രവർത്തനങ്ങളും ഇപ്പോൾ ശേഷിക്കുന്ന എൽ.ടി.ടി.ഇ നേതാക്കളോ കേഡർമാരോ ശ്രമങ്ങൾ ആരംഭിച്ചിട്ടുണ്ട് എന്നും പറയുന്നു.
“എൽടിടിഇ അനുകൂല ഗ്രൂപ്പുകൾ/ഘടകങ്ങൾ ജനങ്ങൾക്കിടയിൽ വിഘടനവാദ പ്രവണത വളർത്തുന്നത് തുടരുകയും ഇന്ത്യയിൽ പ്രത്യേകിച്ച് തമിഴ്നാട്ടിൽ എൽടിടിഇയുടെ പിന്തുണാ അടിത്തറ വർദ്ധിപ്പിക്കുകയും ചെയ്യുന്നു, ഇത് ആത്യന്തികമായി ഇന്ത്യയുടെ പ്രാദേശിക അഖണ്ഡത ശിഥിലീകരണത്തിനായി സ്വാധീനം ചെലുത്തും”– വിജ്ഞാപനത്തിൽ പറഞ്ഞു.
