വിചാരിച്ചത്ര ജനപിന്തുണ പല മുദ്രാവാക്യങ്ങള്്ക്കും ലഭിക്കുന്നില്ലെന്ന ആത്മവിശ്വാസക്കുറവില് ബിജെപി കൂടുതല് ശ്രദ്ധയോടെ സ്ഥാനാര്ഥികളെ നിശ്ചയിക്കുന്നതിന്റെ സൂചനയായി വനിതാ ഗുസ്തി താരങ്ങളെ ലൈംഗികപീഡനത്തിനിരയാക്കിയെന്ന കേസ് നേരിടുന്ന യു.പി. എം.പി ബ്രിജ്ഭൂഷണ് ശരണ്സിങിന് ബിജെപി സീറ്റ് നല്കാതെ കരൺ ഭൂഷൺ സിംഗിന് സീറ്റ് നല്കാന് തീരുമാനിച്ചു.
ഗുസ്തി ഫെഡറേഷന് ദേശീയ പ്രസിഡണ്ട് സ്ഥാനത്തു നിന്നും ബ്രിജ്ഭൂഷണെ മാറ്റി നിര്ത്തിയെങ്കിലും നേരത്തെ ബിജെപി ഒരിക്കലും അദ്ദേഹത്തെ തള്ളിപ്പറഞ്ഞിരുന്നില്ല. പകരം മകനെ ഗുസ്തി ഫെഡറേഷന് പ്രസിഡണ്ടാക്കുകയും ചെയ്തു. ഇദ്ദേഹത്തെ തന്നെയാണ് ഇപ്പോള് പിതാവിനു പകരം സ്ഥാനാര്ഥിയും ആക്കിയിരിക്കുന്നത്.
കൈസർ ഗഞ്ചിലെ സിറ്റിംഗ് എംപിയാണ് ബ്രിജ്ഭൂഷണ്. തൻ്റെ മണ്ഡലത്തിലും പരിസരത്തും അമ്പതോളം സ്വകാര്യ വിദ്യാഭ്യാസ കേന്ദ്രങ്ങൾ ഇദ്ദേഹം നടത്തുന്നുണ്ട്. ഒരു ദശാബ്ദത്തോളം അദ്ദേഹം റെസ്ലിംഗ് ഫെഡറേഷൻ ഓഫ് ഇന്ത്യയുടെ പ്രസിഡൻ്റായിരുന്നു.
ആറ് തവണ എംപിയായിട്ടുള്ള ബ്രിജ് ഭൂഷൻ്റെ ഇളയ മകൻ കരൺ ഭൂഷൺ ഉത്തർപ്രദേശ് റെസ്ലിംഗ് അസോസിയേഷൻ്റെ പ്രസിഡൻ്റാണ്. ഗോണ്ട ജില്ലയിലെ നവാബ്ഗഞ്ചിലുള്ള സഹകരണ ബാങ്കിൻ്റെ ചെയർപേഴ്സൺ കൂടിയാണ് അദ്ദേഹം.
ഡബ്ല്യുഎഫ്ഐ പ്രസിഡൻ്റായിരിക്കെ ലൈംഗികാതിക്രമം ആരോപിച്ച് ബ്രിജ് ഭൂഷണെ അറസ്റ്റ് ചെയ്യണമെന്ന് ആവശ്യപ്പെട്ട് മെഡൽ ജേതാക്കൾ ഉൾപ്പെടെ നിരവധി വനിതാ ഗുസ്തിക്കാർ ബിജെപി നേതാവിനെതിരെ പ്രതിഷേധിച്ചത് ആഗോള തലത്തിൽ വാർത്തയായിരുന്നു. സാക്ഷി മാലിക്കും ബജ്രംഗ് പുനിയയും ഉൾപ്പെടെയുള്ള ഗുസ്തി താരങ്ങൾ ഭൂഷണെതിരെ നടപടി ആവശ്യപ്പെട്ട് ജന്തർ മന്തറിൽ നീണ്ട പ്രതിഷേധ സമരം നടത്തിയിരുന്നു. ജൂൺ 15ന് ഐപിസി സെക്ഷൻ 354 (സ്ത്രീയുടെ അഭിമാനത്തെ പ്രകോപിപ്പിക്കുക എന്ന ഉദ്ദേശത്തോടെ ആക്രമിക്കുകയോ ക്രിമിനൽ ബലപ്രയോഗം നടത്തുകയോ ചെയ്യുക), 354 എ (ലൈംഗിക പീഡനം), 354 ഡി (പിന്തുടരൽ), 506 ( ഭീഷണിപ്പെടുത്തൽ) എന്നിവ പ്രകാരം ഡൽഹി പോലീസ് ഭൂഷണെതിരെ പിന്നീട് കേസ് രജിസ്റ്റർ ചെയ്തു. എന്നാൽ 2023 ജൂലൈ 20-ന് അദ്ദേഹത്തിന് ജാമ്യം ലഭിച്ചു.
