പശ്ചിമബംഗാളില് നിന്നും ഉപജീവനം തേടി കേരളത്തിലേക്ക് ലക്ഷങ്ങള് ഒഴുകിയപ്പോഴാണ് അവിടുത്തെ ദാരിദ്ര്യാവസ്ഥയുടെ ആഴം മലയാളികള് അറിഞ്ഞത്. മൂന്നു ദശാബ്ദത്തിലേറെ ഇടതുപക്ഷം ഭരിച്ചിട്ടും പിന്നീട് ആ ഭരണം തൂത്തെറിഞ്ഞ് തൃണമൂല് ഭരിക്കുമ്പോഴും ബംഗാളി ഗ്രാമങ്ങളിലൂടെ സഞ്ചരിച്ചാല് ദാരിദ്ര്യത്തിന്റെ മുദ്രകള് എവിടെയും ധാരാളമായി കാണാനാവും. എന്നാല് പൗരന്മാരുടെ സംരക്ഷകരായി നിയമനിര്മ്മാണ സഭയിലെത്തുന്നവരില് പലരും കോടിപതികളാണ് എന്ന വൈരുദ്ധ്യം ബംഗാളില് കാണാം.
ലോക്സഭാ തിരഞ്ഞെടുപ്പിന്റെ ആദ്യഘട്ടത്തില് ബംഗാളില് മല്സരിക്കുന്ന സ്ഥാനാര്ഥികളില് പശ്ചിമ ബംഗാളിലെ ജൽപായ്ഗുരി (എസ്സി), കൂച്ച് ബെഹാർ (എസ്സി), അലിപുർദുവാർ (എസ്ടി) എന്നീ സീറ്റുകളിൽ നിന്ന് മത്സരിക്കുന്ന 37 സ്ഥാനാർത്ഥികളിൽ പത്ത് പേരും കോടീശ്വരന്മാരാണെന്ന് അവരുടെ സത്യവാങ്മൂലത്തിൻ്റെ വിശകലനം വെളിപ്പെടുത്തുന്നു.
ജൽപായ്ഗുരി (എസ്സി) ലോക്സഭാ സീറ്റിൽ മത്സരിക്കുന്ന സിപിഎമ്മിൻ്റെ ദേബ്രാജ് ബർമൻ്റെ ആസ്തി 3,89,89,468 രൂപയാണ്. അലിപുർദുവാറിൽ (എസ്ടി) മത്സരിക്കുന്ന എസ്യുസിഐയുടെ ചന്ദൻ ഒറോൺ ആണ് ഏറ്റവും ദരിദ്രൻ — ആസ്തി 12,117 രൂപ മാത്രം.
