മണിപ്പൂർ വിഷയത്തിൽ രാജ്യസഭയിൽ ഹ്രസ്വ ചർച്ച ആവശ്യപ്പെട്ടവരിൽ ബി.ജെ.പി എം.പിമാർക്കൊപ്പം പ്രതിപക്ഷ പാർട്ടികളിലെ അംഗങ്ങളും ഉൾപ്പെട്ടത് വിവാദമായി. കേരളത്തിൽ നിന്നുള്ള നാല് സി.പി.എം എം.പിമാരും പട്ടികയിൽ ഉണ്ട്.
ജോൺ ബ്രിട്ടാസ്, എളമരം കരീം, വി.ശിവദാസൻ, എ.എ. റഹിം എന്നിവരാണ് പട്ടികയിൽ ഉള്ളത്. ഇവർക്കൊപ്പം കോൺഗ്രസ്, എൻ.സി.പി, ആർ.ജെ.ഡി പാർട്ടികളിലെ എം.പിമാരും പട്ടികയിലുണ്ട്. ചട്ടം 267 പ്രകാരമുള്ള സഭ നിറുത്തിവച്ചുള്ള ചർച്ച വേണമെന്ന കൂട്ടായ തീരുമാനത്തിനിടെയാണ് ഇത്.
താൻ നോട്ടീസ് നൽകിയിട്ടില്ലെന്ന് എ.എ. റഹിം രാജ്യസഭയിൽ അറിയിച്ചു. എന്നാൽ സി.പി.എം നൽകിയ നോട്ടീസുകളിൽ റഹിമിന്റെ പേരും ഉണ്ടെന്ന് ബി.ജെ.പി വാദിച്ചു. 20ന് പുറത്തുവന്ന പട്ടികയിൽ ബ്രിട്ടാസിന്റെ പേര് മാത്രമാണ് ഉണ്ടായിരുന്നത്.
