തിരുവനന്തപുരത്ത് വീടിനുളളില്‍ വെച്ച് പാമ്പുകടിയേറ്റ് പത്താം ക്ലാസ് വിദ്യാര്‍ത്ഥി മരിച്ചു. കാട്ടാക്കട ഒറ്റശേഖരമംഗലത്താണ് സംഭവം. അഭിനവ് സുനില്‍(16) എന്ന വിദ്യാര്‍ഥിയാണ് മരിച്ചത്. വ്യാഴാഴ്ച്ച വൈകുന്നേരം 6.30ഓടെയാണ് പാമ്പുകടിയേറ്റത്.
വീടിനുള്ളില്‍ പഠിച്ചുകൊണ്ടിരിക്കുകയായിരുന്ന അഭിനവിന് തന്നെ എന്തോ ജീവി കടിച്ചതായി സംശയം തോന്നി. കുട്ടി വിവരം വീട്ടില്‍ പറയുകയും ഉടന്‍ തന്നെ അച്ഛന്‍ സുനിലിന്റെ ഓട്ടോയില്‍ സമീപത്തെ ആശുപത്രിയില്‍ എത്തി പ്രാഥമിക ചികിത്സ നല്‍കുകയും ചെയ്തു. എലിയാകാം കടിച്ചത് എന്നാണ് വീട്ടുകാര്‍ ആദ്യം കരുതിയത്. പിന്നീടാണ് പാമ്പ് കടിയേറ്റതാകാമെന്ന സംശയമുണ്ടായത്.
ആരോഗ്യസ്ഥിതി വഷളായപ്പോഴാണ് കാട്ടാക്കടയിലെ സ്വകാര്യ ആശുപത്രിയില്‍ എത്തിച്ചത്. ഇവിടെ നിന്ന് തിരുവനന്തപുരം മെഡിക്കല്‍ കോളജിലേക്ക് കൊണ്ടു പോകാന്‍ നിര്‍ദ്ദേശിച്ചു. ആശുപത്രിയിലെത്തിച്ചെങ്കിലും കുട്ടിയെ രക്ഷിക്കാനായില്ല.
