2002 ലെ ഗുജറാത്ത് കലാപവുമായി ബന്ധപ്പെട്ട് ബിബിസി സംപ്രേഷണം ചെയ്ത ഡോക്യുമെന്ററി കേന്ദ്രസർക്കാർ നിരോധിച്ചതിനെ ചോദ്യം ചെയ്തുള്ള ഹർജി ഫെബ്രുവരി ആറിന് പരിശോധിക്കാൻ സുപ്രീം കോടതി സമ്മതിച്ചു . ചീഫ് ജസ്റ്റിസ് ഡി വൈ ചന്ദ്രചൂഡ് അധ്യക്ഷനായ ബെഞ്ചിന് മുമ്പാകെ അടിയന്തര ലിസ്റ്റിംഗിനുള്ള ഹർജി അഭിഭാഷകൻ എം എൽ ശർമ്മ പരാമർശിച്ചു. അപ്പോൾ ഫെബ്രുവരി ആറിന് വാദം കേൾക്കാമെന്ന് സുപ്രീം കോടതി സമ്മതിക്കുകയായിരുന്നു.
ഡോക്യുമെന്ററിയുടെ ലിങ്കുകളുള്ള തങ്ങളുടെ ട്വീറ്റുകൾ നീക്കം ചെയ്തതിനെ ചോദ്യം ചെയ്ത് മാധ്യമപ്രവർത്തകൻ എൻ. റാമും അഭിഭാഷകൻ പ്രശാന്ത് ഭൂഷണും സമർപ്പിച്ച പ്രത്യേക ഹർജിയും സുപ്രീം കോടതി അടുത്ത തിങ്കളാഴ്ച പരിഗണിക്കും.
പൊതുജനങ്ങൾക്കായി റിലീസ് ചെയ്തുവെങ്കിലും സത്യത്തെ ഭയന്ന് ഡോക്യുമെന്ററി ഇന്ത്യയിൽ കാണുന്നതിൽ നിന്ന് 2021 ലെ ഐടി ആക്ട് 16-ന്റെ റൂൾ 16 പ്രകാരം ഒരു വിധത്തിലും വിലക്കിയിരിക്കുകയാണെന്ന് ശർമ്മ സമർപ്പിച്ച ഹർജിയിൽ വാദിച്ചു .
ജനുവരി 21ലെ ഐടി ആക്ട് പ്രകാരമുള്ള ഉത്തരവ് നിയമവിരുദ്ധവും ദുരുദ്ദേശപരവും ഏകപക്ഷീയവും ഭരണഘടനാ വിരുദ്ധവും അസാധുവായതും ഇന്ത്യൻ ഭരണഘടനയുടെ തീവ്രമായ ലംഘനവുമാണെന്നും ശർമയുടെ ഹർജിയിൽ പറയുന്നു.
