ഏതെങ്കിലും തീവ്രവാദി സംഘടനയെ നിരോധിക്കണമെങ്കില്‍ ആദ്യം നിരോധിക്കേണ്ടത്‌ ആര്‍.എസ്‌.എസിനെയാണെന്ന്‌ സി.പി.എം. സംസ്ഥാന സെക്രട്ടറി എം.വി.ഗോവിന്ദന്‍. കണ്ണൂരിൽ പ്രതികരിക്കുകയായിരുന്നു അദ്ദേഹം. ഒരു തീവ്രവാദ സംഘടനയെയോ വർഗീയ ശക്തിയെയോ നിരോധിക്കുന്നത് കൊണ്ട് അതിന്റെ പ്രവർത്തനം അവസാനിപ്പിക്കില്ലെന്നും ഗോവിന്ദൻ പറഞ്ഞു. പോപ്പുലർ ഫ്രണ്ട് ഓഫ് ഇന്ത്യയെ ഭീകരസംഘടനകളുടെ പട്ടികയിൽ ഉൾപ്പെടുത്താൻ കേന്ദ്രസർക്കാർ ആലോചിക്കുന്നുവെന്ന റിപ്പോർട്ടുകൾക്കിടെയാണ് സിപി എം സംസ്ഥാന സെക്രട്ടറിയുടെ പ്രതികരണം. കേരളം ഇപ്പോൾ തീവ്രവാദത്തിന്റെയും പ്രാന്ത ഘടകങ്ങളുടെയും “ഹോട്ട്‌സ്‌പോട്ട്” ആണെന്നും ദക്ഷിണേന്ത്യൻ സംസ്ഥാനത്ത് ജീവിതം സുരക്ഷിതമല്ലെന്നും ബിജെപി അധ്യക്ഷൻ ജെപി നദ്ദ കഴിഞ്ഞ ദിവസം കേരളത്തിൽ പരിപാടിയിൽ പങ്കെടുക്കാനെത്തിയപ്പോൾ അഭിപ്രായപ്പെട്ടിരുന്നു.
“ഒരു സംഘടനയെ നിരോധിക്കണമെങ്കിൽ ആദ്യം അത് ആർഎസ്എസ്-നെ ആകണം. വർഗീയ പ്രവർത്തനങ്ങൾ നടത്തുന്ന പ്രധാന സംഘടനയാണിത്. നിരോധിക്കുമോ? തീവ്രവാദ സംഘടനയെ നിരോധിച്ചാൽ പ്രശ്‌നപരിഹാരമാവില്ല. ആർഎസ്എസിനെ നേരത്തെ നിരോധിച്ചതാണ്. ഒരു സംഘടനയെ നിരോധിക്കുന്നതുകൊണ്ട് അതിന്റെ പ്രത്യയശാസ്ത്രം അവസാനിക്കില്ല. അവർ ഒരു പുതിയ പേരോ ഐഡന്റിറ്റിയോ ഉപയോഗിച്ച് മടങ്ങിവരും . ഇത്തരം ഗ്രൂപ്പുകൾക്കെതിരെ ബോധവൽക്കരണം നടത്തുകയും നിയമവിരുദ്ധമായി എന്തെങ്കിലും ചെയ്താൽ അവർക്കെതിരെ നിയമനടപടി സ്വീകരിക്കുകയും വേണം” –ഗോവിന്ദൻ മാധ്യമപ്രവർത്തകരോട് പറഞ്ഞു. ആർഎസ്എസും ബിജെപിയും സംഘപരിവാറുമാണ് നിലവിൽ പിഎഫ്ഐയെ നിരോധിക്കാൻ ശ്രമിക്കുന്നതെന്നും രണ്ട് വർഗീയ ശക്തികൾ പരസ്പരം ഏറ്റുമുട്ടുമ്പോൾ അവർ പരസ്പരം ശക്തരാകുകകയാണെന്നും അദ്ദേഹം പറഞ്ഞു.
