നിപ രോഗബാധിതരെ ചികില്‍സിച്ചതിലൂടെ രോഗം പകര്‍ന്ന്‌ മരണത്തിലേക്ക്‌ മറഞ്ഞു പോയ കോഴിക്കോട് പേരാമ്പ്ര സ്വദേശിനിയായ നഴ്‌സ്‌ ലിനിയുടെ ഭര്‍ത്താവ്‌ സജീഷ് വീണ്ടും വിവാഹിതനാകുന്നു. കൊയിലാണ്ടി സ്വദേശി പ്രതിഭയാണ് വധു. അധ്യാപികയാണ് പ്രതിഭ. ഈ മാസം 29ന് വടകര ലോകനാര്‍ക്കാവ് ക്ഷേത്രത്തിലാണ് വിവാഹം. സജീഷ് ഫെയ്സ്ബുക്കിലൂടെയാണ് വിവാഹക്കാര്യം അറിയിച്ചത്. 2018-ലാണ് പേരാമ്പ്ര താലൂക്ക് ആശുപത്രിയിലെ നഴ്സായിരുന്ന ലിനി നിപ ബാധിച്ച് മരിച്ചത് .
ഫെയ്സ്ബുക് കുറിപ്പ്:
പ്രിയ സുഹൃത്തുക്കളെ,
ഞാനും മക്കളും പുതിയ ഒരു ജീവിതത്തിലേക്ക്‌ കാലെടുത്തു വയ്ക്കുകയാണ്‌. റിതുലിനും സിദ്ധാർഥിനും ഇനി അമ്മയും ചേച്ചിയുമായി ഇവരും കൂടെ ഉണ്ടാകും. ഈ വരുന്ന ആഗസ്റ്റ്‌ 29 ന് വടകര ലോകനാർകാവ്‌ ക്ഷേത്രത്തിൽ വച്ച്‌ ഞങ്ങൾ വിവാഹിതരാവുകയാണ്‌. ഇതുവരെ നിങ്ങൾ നൽകിയ എല്ലാ കരുതലും സ്നേഹവും കൂടെ തന്നെ വേണം. എല്ലാവരുടെയും അനുഗ്രഹവും പ്രാർഥനകളും ആശംസകളും ഞങ്ങളോടൊപ്പം ഉണ്ടാകണം…..സജീഷ്, റിതുൽ, സിദ്ധാർഥ്, പ്രതിഭ, ദേവപ്രിയ
