ശതകോടീശ്വരനായ ഓഹരി വ്യാപാരിയും നിക്ഷേപകനുമായ രാകേഷ് ജുൻജുൻവാല (62) ഞായറാഴ്ച രാവിലെ അന്തരിച്ചു. മുംബൈയിലെ ബ്രീച്ച് കാൻഡി ഹോസ്പിറ്റലിൽ രാവിലെ 6.45 ഓടെയാണ് മരണം സംഭവിച്ചതെന്ന് ആശുപത്രി വൃത്തങ്ങൾ അറിയിച്ചു. അടുത്തിടെ ഇന്ത്യന്‍ ആകാശത്ത്‌ പറന്നു തുടങ്ങിയ പുതിയ ബജറ്റ്‌ എയര്‍ലൈന്‍ ആയ ആകാശ എയര്‍ലൈന്‍സിന്റെ കൂടി പാര്‍ട്‌ണറാണ്‌ രാകേഷ്. നിക്ഷേപകൻ എന്നതിലുപരി, ആപ്‌ടെക് ലിമിറ്റഡിന്റെയും ഹംഗാമ ഡിജിറ്റൽ മീഡിയ എന്റർടൈൻമെന്റ് പ്രൈവറ്റ് ലിമിറ്റഡിന്റെയും ചെയർമാനായിരുന്നു ജുൻജുൻവാല. നിരവധി ഇന്ത്യൻ കമ്പനികളുടെ ഡയറക്ടർമാരിൽ ഒരാളായിരുന്നു അദ്ദേഹം. ഐക്യരാഷ്ട്രങ്ങൾക്കായുള്ള ഇന്ത്യയുടെ അന്താരാഷ്ട്ര പ്രസ്ഥാനത്തിന്റെ ഉപദേശകൻ കൂടിയായിരുന്നു അദ്ദേഹം.
ജുൻജുൻവാലയുടെ വിയോഗത്തിൽ പ്രധാനമന്ത്രി നരേന്ദ്ര മോദി അനുശോചനം രേഖപ്പെടുത്തി. “രാകേഷ് ജുൻജുൻവാല അജയ്യനായിരുന്നു. ജീവിതവും നർമ്മബോധവും ഉൾക്കാഴ്ചയുമുള്ള അദ്ദേഹം സാമ്പത്തിക ലോകത്തിന് മായാത്ത സംഭാവനകൾ നൽകിയെന്ന് പ്രധാനമന്ത്രി അനുസ്മരിച്ചു. വാണിജ്യ, വ്യവസായ മന്ത്രി പിയൂഷ് ഗോയലും അനുശോചനം രേഖപ്പെടുത്തി.
