കൊല്ലത്ത് സ്ത്രീധനപീഢനത്തിനിരയായി കൊല്ലപ്പെട്ട വിസ്മയയുടെ ഭര്ത്താവ് കിരണ്കുമാറിന്റെ വക്കാലത്ത് ഏറ്റെടുത്ത് ജാമ്യത്തിനായി അപേക്ഷിച്ച വിവാദ ക്രിമിനല് വക്കീല് ബി.എ.ആളുരിന്റെ വിതണ്ഡവാദമൊന്നും കോടതിയില് വിലപ്പോയില്ല. ശാസ്താംകോട്ട ഫസ്റ്റ് ക്ലാസ് ജുഡീഷ്യല് മജിസ്ട്രേറ്റ് കോടതി കിരണിന്റെ ജാമ്യാപേക്ഷ തള്ളി. ഇതോടെ പ്രതി ജുഡീഷ്യല് കസ്റ്റഡിയില് തന്നെ തുടരും.
കഴിഞ്ഞ വെള്ളിയാഴ്ചയാണ് അഡ്വ. ബി.എ. ആളൂര് മുഖേന കിരണ്കുമാര് ശാസ്താംകോട്ട കോടതിയില് ജാമ്യാപേക്ഷ സമര്പ്പിച്ചത്. തുടര്ന്ന് വാദം കേട്ട മജിസ്ട്രേറ്റ് എ.ഹാഷിം ജാമ്യാപേക്ഷ പരിഗണിക്കുന്നത് തിങ്കളാഴ്ചത്തേക്ക് മാറ്റിവെയ്ക്കുകയായിരുന്നു. തിങ്കളാഴ്ച രാവിലെ കേസ് പരിഗണിച്ച മജിസ്ട്രേറ്റ് ജാമ്യാപേക്ഷ തള്ളി ഉത്തരവിട്ടു.
കിരണ്കുമാര് അറിയപ്പെടുന്ന ഉദ്യോഗസ്ഥനാണെന്നും ഇത്രയും കാലത്തിനിടയില് ഒരു കേസിലും പ്രതി ചേര്ക്കപ്പെട്ടിട്ടില്ലെന്നുമാണ് ബി.എ. ആളൂര് നേരത്തെ കോടതിയില് വാദിച്ചത്. പോലീസ് മനഃപൂര്വം കള്ളക്കേസില് കുടുക്കാന് ശ്രമിക്കുകയാണ്. സമാനമായ പല ആത്മഹത്യകളുണ്ടായിട്ടുണ്ടെങ്കിലും ഇത്രയും ശുഷ്കാന്തി പോലീസ് കാണിച്ചിട്ടില്ല. ഈ കേസില് പോലീസ് കാണിക്കുന്നത് അമിതാവേശമാണ്. സ്ത്രീധനപീഡനം (498 എ.) വകുപ്പ് ചുമത്താവുന്ന കുറ്റമാണെന്നും ആളൂര് വാദിച്ചിരുന്നു.
എന്നാല്, ആളൂരിന്റെ വാദം അസി.പബ്ളിക് പ്രോസിക്യൂട്ടര്(എ.പി.പി.) കാവ്യനായര് എതിര്ത്തു.
